Մարտի 25-ին Սուրբ Աթոռում ՀՀ դեսպան Կարեն Նազարյանը հարցազրույց է տվել “Շանթ” հեռուստաընկերությամբ հեռարձակվող «Հեռանկար» հաղորդաշարին: Հարցազրույցի ընթացքում դեսպան Նազարյանը ներկայացրել է նոր տիպի կորոնավիրուսի տարածմամբ պայմանավորված համաճարակային իրադրության պայմաններում Սուրբ Աթոռում և Իտալիայի Հանրապետությունում ՀՀ դեսպանությունների գործունեությունը, Իտալիայից ՀՀ քաղաքացիների հայրենիք վերադարձի և դեռևս Իտալիայում գտնվող ՀՀ քաղաքացիների վերաբերյալ մանրամասներ, ինչպես նաև խոսել էստեղծված իրավիճակում երկրների միջև փորձի փոխանակման կարևորության մասին։ 

Ստորև` հատված հարցազրույցից․ 

Հարց․ Դիվանագետները, և, մասնավորապես Դուք, դիվանագիտական ծառայությունները, արդյո՞ք աշխատում եք ամբողջ ծանրաբեռնվածությամբ։

Կարեն Նազարյան։ Անշուշտ։  Աշխատանքն ընթանում է սովորականի համաձայն։ Գործում են թեժ գծերը երկու դեսպանություններում էլ։ Կապը մշտական է մեր քաղաքացիների հետ։ Որոշ դեպքերում անցնում ենք, այսպես ասած, հեռավար աշխատանքի, բայց և՛ դեսպանությունների, և՛ Երևանի միջև կապն անխափան է։ 

Հարց․ Ըստ Ձեզ, քանի՞ ՀՀ քաղաքացի հիմա կա Իտալիայում։

Կարեն Նազարյան. Նախ ասեմ, որ Հռոմում տեղակայված մեր զույգ դեսպանությունները մշտապես կապի մեջ են մեր հայրենակիցների հետ։ Արդեն տևական ժամանակ է, որ գործող թեժ գծերի միջոցով մեզ հասանելի են նրանց տվյալները, ժամանակավոր բնակության վայրերը։ Ունենք ուսանողներ, որոնք տեղակայված են Իտալիայի հյուսիսային շրջաններում, մենք նրանց հետ կապի մեջ ենք։ Ի դեպ, ասեմ, որ երիստասարդներից մեկը, իր փոխանցմամբ, արդեն իսկ ստացել է անհրաժեշտ բուժում և ամբողջական կազդուրման փուլն արդեն անցել է, մարտի 29-ին նախատեսվում է նրա վերադարձը հայրենիք։ Մեկ այլ օրինակ. ստացել ենք տեղեկատվություն ՀՀ քաղաքացուց, ով նավով երեկ ժամանել է Հռոմ։ Նավի վրա կան վարակվածներ, որի հետևանքով մեր քաղաքացին մյուս ուղևորների հետ մեկտեղ կենթարկվի բժկական զննման և այդ գործընթացից անմիջապես հետո մենք կշարունակենք մեր քաղաքացու՝ դեպի տուն վերադարձի հարցում մեր խորհրդատվությունները և աշխատանքը։ Առհասարակ նշեմ, որ գուցե մինչև 70 ՀՀ քաղաքացիներ կան, որոնք ունեն նաև կացության թույլտվություն և այս պահին բնակվում են Իտալիայում։

Հարց․ Մեր քաղաքացիներից քանի՞սն են ցանկություն հայտնել վերադառնալ հայրենիք։ 

Կարեն Նազարյան. Մեր քաղաքացիներից ցանկություն հայտնեցին վերադառնալ, ինչպես գիտեք, 67-ը և նրանք արդեն վերադարձել են Հայաստան՝ չարթերային թռիչքի միջոցով, իսկ մնացածը տեղյակ էին թռիչքի մասին, բայց նրանց որոշումն էր դեռևս որոշակի ժամանակաշրջան մնալ Իտալիայում։ Ինչպես գիտեք, վերադարձը կամավոր էր և մենք այդ գործընթացն իրականացնում էինք մեր քաղաքացիների ցանկության համաձայն։» 

Հարցազրույցն ամբողությամբ հասանելի է տեսանյութում։