Ընդհանուր տեղեկություններ

Հայաստանի Հանրապետության և Վրաստանի միջև դիվանագիտական հարաբերությունները հաստատվել են 1992թ. հուլիսի 17-ին:

Վրաստանում ՀՀ դեսպանությունը հիմնվել է 1993թ. հուլիսին: 2008թ. ապրիլին Բաթումում հիմնվել է ՀՀ գլխավոր հյուպատոսությունը: 2022թ. սեպտեմբերից Վրաստանում Հայաստանի Հանրապետության դեսպանն է Աշոտ Սմբատյանը: ՀՀ-ում Վրաստանի դեսպանությունը հիմնվել է 1995թ. մայիսին: 2023թ. փետրվարի 28-ին ՀՀ-ում Վրաստանի դեսպան Գիորգի Շարվաշիձեն իր հավատարմագրերն է հանձնել ՀՀ նախագահ Վահագն Խաչատուրյանին:

Երկկողմ հարաբերությունների իրավապայմանագրային հիմնարար փաստաթուղթը 2001թ. հոկտեմբերին ստորագրված «Բարեկամության, համագործակցության և փոխադարձ անվտանգության մասին» պայմանագիրն է:

ՀՀ կառավարության 2021-2026թթ. ծրագրում արձանագրվել է, որ Կառավարությունն ապահովելու է Վրաստանի հետ առանձնահատուկ և բարիդրացիական հարաբերությունների հետագա զարգացումը:

ՀՀ-ի և Վրաստանի միջև ձևավորվել է միջխորհրդարանական բարեկամական խումբ:

Երկու երկրների միջև գործում է տնտեսական համագործակցության միջկառավարական հանձնաժողովը, որի 13-րդ նիստը կայացել է 2024թ. հունվարի 26-ին Թբիլիսիում Հայաստանի Հանրապետության և Վրաստանի վարչապետների գլխավորությամբ: Նիստի ընթացքում երկու երկրների կառավարությունների ղեկավարները ստորագրել են «Հայաստանի Հանրապետության և Վրաստանի միջև ռազմավարական գործընկերություն հաստատելու մասին» համատեղ հռչակագիրը՝ որակապես նոր մակարդակի բարձրացնելով Հայաստան-Վրաստան հարաբերությունները։

ՀՀ և Վրաստանի բարձրաստիճան պաշտոնյաների և ոլորտային գերատեսչությունների ղեկավարների միջև հանդիպումներն ու շփումները կրում են պարբերական բնույթ: Երկու երկրների արտաքին գործերի նախարարությունների միջև պարբերաբար տեղի են ունենում քաղաքական խորհրդակցություններ:

Այցեր

Վրաստան

Հայաստան

Ներբեռնել այցերի ողջ ցանկը

Իրավապայմանագրային դաշտը

Հայաստանի Հանրապետության և Վրաստանի միջև գործում են փոխհարաբերությունների գրեթե բոլոր ոլորտներն ընդգրկող շուրջ 120 միջազգային պայմանագրեր, համաձայնագրեր, հուշագրեր և արձանագրություններ։

Ներբեռնել ողջ ցանկը

Առևտրատնտեսական կապեր

Առևտրատնտեսական բնագավառում գործում են առևտրի, երկակի հարկերից խուսափելու, ավտոմոբիլային և օդային հաղորդակցության, իրավական օգնության, ներդրումների խրախուսման և տնտեսական կապերի զարգացման և այլ ոլորտների համար նպաստավոր պայմաններ ստեղծող մի շարք փաստաթղթեր:

Հայաստանի Հանրապետության և Վրաստանի միջև ապրանքաշրջանառության ծավալները /հազար ԱՄՆ դոլար/

Վրաստանից ՀՀ ներմուծվող հիմնական ապրանքատեսակներն են՝

գյուղմթերք, հանքային ջրեր, քիմիական արտադրանք, դեղամիջոցներ:

ՀՀ-ից Վրաստան արտահանվող հիմնական ապրանքատեսակներն են՝

լեռնարդյունահանող սարքավորումներ, բուսաբուծական և թռչնաբուծական ապրանքներ, գյուղմթերք, սննդի արդյունաբերության արտադրանք:

Թարմացված է՝ 27.11.2024թ.