Անձի քաղաքացիության մասին տեղեկանք
Անձի՝ ՀՀ քաղաքացիության առկայության կամ բացակայության մասին տեղեկանքը, որպես կանոն, պահանջվում է օտարերկրյա պետությունների իրավասու մարմիններին ներկայացնելու համար՝ օտարեկրյա պետություններում կացության կարգավիճակ ձեռք բերելու, տվյալ երկրի քաղաքացիություն ստանալու և այլ գործընթացների շրջանակներում:
Ստանալու ընթացակարգը, տեղեկություն տրամադրելու ժամկետները, տեղեկություն ստանալու իրավունք ունեցողների ցանկը և տեղեկատվության տրամադրումը մերժելու հիմքերը սահմանվում են ՀՀ կառավարության 2007 թվականի հոկտեմբերի 4-ի N 1154-Ն որոշմամբ հաստատված կարգով:
Ո՞վ կարող է դիմել
Յուրաքանչյուր ոք
Ի՞նչ փաստաթղթեր են անհրաժեշտ քաղաքացիության մասին տեղեկանք ստանալու համար
- դիմում, (ներբեռնել)
- անձը հաստատող փաստաթուղթ կամ դրա պատճենը,
- նախկին ՀԽՍՀ քաղաքացու անձնագիր (առկայության դեպքում): Անձնագրի կորստյան դեպքում դրա վերաբերյալ տվյալներ (անձնագրի սերիա /համար, որ անձնագրային բաժնից է ստացել, որ թվականին),
- այլ փաստաթղթեր և տվյալներ (իրավասու մարմնի պահանջով՝ անհրաժեշտության դեպքում), եթե իրավասու մարմնում առկա չէ անձի քաղաքացիության վերաբերյալ տեղեկատվություն, և անհրաժեշտ է պարզել վերջինիս քաղաքացիությունը։ Այս դեպքում ներկայացվում են նաև ծննդյան վկայականի, ծնողների անձը հաստատող փաստաթղթերի, ծնողների ամուսնության կամ հայրության ճանաչման վկայականի կամ միայնակ մայր հանդիսանալու վերաբերյալ տեղեկանքի պատճենները,
- չափահաս անձի կողմից ծնողի քաղաքացիության պարզման դեպքում, եթե նա մահացել է, ծնողի մահվան վկայականի պատճենը:
Վերոգրյալ փաստաթղթերի ներկայացման անհնարինության պարագայում, անհրաժեշտ է ներկայացնել մանրամասն դիմում՝ պահանջվող տեղեկատվության նկարագրությամբ:
Ներկայացուցչի կողմից գրավոր հարցման պարագայում վերոնշյալ փաստաթղթերից բացի ներկայացվում են
- անձի կողմից տրված լիազորագիր (նոտարական վավերացում չի պահանջվում),
- լիազորողի և լիազորված անձի անձնագրերի պատճենները:
Որտե՞ղ դիմել անձի քաղաքացիության տեղեկանք ստանալու համար
Քաղաքացիության վերաբերյալ տեղեկանքը Հայաստանի Հանրապետությունում տրամադրում է ՀՀ միգրացիայի և քաղաքացիության ծառայությունը, իսկ օտարերկրյա պետությունում՝ ՀՀ դեսպանությունը կամ հյուպատոսական հիմնարկը:
Անձի քաղաքացիության տեղեկանքի համար պետական տուրքի չափը և վճարման եղանակը
https://www.e-payments.am/hy/consular_services/step2/cservice=48/
Կարևոր ծանոթագրություն
Անձի քաղաքացիության տեղեկանքը վավերական է տրամադրման պահից վեցամսյա ժամկետում: