Հարց. Պարոն նախարար, ադրբեջանական լրատվամիջոցների տարածած տեղեկատվության համաձայն ԵԱՀԿ ՄԽ համանախագահ Մեթյու Բրայզան Բաքվում հայտարարել է, որ Թուրքիան կարող է իր ներդրումն ունենալ ղարաբաղյան կարգավորման գործընթացում եւ Հայաստանին օգնել հանդես գալ ավելի ճկուն դիրքերից: Ինչպես եք վերաբերվում նման տեսակետին:

Պատասխան. Եթե հավատանք ադրբեջանական լրատվամիջոցների մեջբերումներին, ապա ամենայն հավանականությամբ, պարոն Բրայզան, սխալմամբ Ադրբեջանի փոխարեն օգտագործել է Հայաստանի անունը, քանզի Թուրքիան իր ազդեցությունը կարող է օգտագործել Ադրբեջանի դիրքորոշումը առավել ճկուն դարձնելու համար, ելնելով այն իրողությունից, որ թե Թուրքիայի, թե Ադրբեջանի ղեկավարները բնութագրելով թուրք-ադրբեջանական հարաբերությունները բազմիցս այն բնորոշել են «մեկ ազգ` երկու պետություն» բանաձեւով: Եւ այդ ենթատեքստում խոսել Հայաստանի վրա Թուրքիայի հնարավոր ազդեցության մասին, կարծում եմ, ակնհայտ չափազանցություն է:

Հարց. Ճիշտ են արդյոք Շվեյցարիայում հայ եւ թուրք դիվանագետների հանդիպման մասին լուրերը:

Պատասխան. Հայ եւ թուրք դիվանագետների շփումներ միշտ էլ եղել են եւ որեւցիցե արտառոծ բան չկա այդ հանդիպումների մեջ:

Հարց. Լուրեր կան Թուրքիայի ԱԳ նախարարի միջնորդությամբ` Նյու-Յորքում եռակողմ (Հայաստան-Ադրբեջան-Թուրքիա) հանդիպման մասին; Կարող եք հաստատել այդ տեղեկությունները:

Պատասխան. Դեռեւս սեպտեմբերի 7-ին Երեւանում ես եւ Թուրքիայի ԱԳ նախարարը պայմանավորվեցինք հանդիպել Նյու-Յորքում ՄԱԿ-ի գլխավոր ասամբլեայի շրջանակներում: Պարոն Բաբաջանը առաջարկել է հանդիպում կազմակերպել նաեւ եռակողմ ձեւաչափով: Ես դեմ չեմ նման հանդիպման կազմակերպմանը:

Հարց. Այժմ ակտիվորեն շրջանառվում են Մինսկի խմբի ձեւաչափի փոփոխության մասին խոսակցությունները: Որքանո՞վ կարող են դրանք հիմնավոր լինել:

Պատասխան. Մինսկի խումբը Լեռնային Ղարաբաղի կարգարվորման գործընթացի գործող ձեւաչափ է, որն ապացուցել իր կենսունակությունը եւ վայելում է միջազգային հանրության աջակցությունը: Հիմնախնդրի կարգավորման բանակցությունները շարունակվում են ԵԱՀԿ Մինսկի խմբի համանախագահների առաջարկությունների հիման վրա եւ այդ ձեւաչափում: Կարծում եմ այսօր լավ նախադրյալներ կան հիմնախնդրի կարգավորման համար, ինչը բոլոր երկրների համար տարածաշրջանային համագործակցության նոր հնարավորություններ կարող է ստեղծել:

Հարց. Թուրքական լրատվամիջոցների համաձայն Նյու-Յորքում Ալի Բաբաջանի հետ Ձեր հանդիպման ժամանակ ստորագրվելու են ինչ-որ փաստաղթեր: Ի՞նչ կասեք այդ տեղեկությունների իսկության վերաբերյալ:

Պատասխան. Հայաստանի եւ Թուրքիայի նախագահների հանձնարարությամբ, Թուրքիայի ԱԳ նախարար Բաբաջանի հետ անցկացված բանակցությունների արդյունքում մենք` երկու արտգործնախարարներս, հայտնեցինք երկկողմ հարաբերությունների լիակատար կարգավորման մեր վճռականության մասին եւ փորձում ենք քայլեր ձեռնարկել այդ ուղղությամբ: Հուսով եմ, որ մենք կգնանք այդ ճանապարհով առանց միմյանց առջեւ արհեստական խոչընդոտներ ստեղծելու: