Հարց. - Պարոն նախարար, երեկ ադրբեջանցիները տարածեցին հաղորդագրություն հայ մոլորյալ հովվի սպանության մասին: Պաշտպանության նախարարության հայտարարությունից պարզ է դառնում, որ մոլորյալ հովիվը ահաբեկիչ չէր, որեւէ ծառայության կողմից նախապատրաստված չէր, իսկ ադրբեջանցիներն իրենց ոճրագործությունը թաքցնելու նպատակով հայտարարում էին, որ նա Հայաստանի հատուկ ծառայությունների կողմից նախապատրաստված ահաբեկիչ էր: Պարզ է, որ այդ ոճրագործությունով Ադրբեջանը խախտել է միջազգային հումանիտար իրավունքի նորմերը, ինչպես նաեւ ռազմագերիների վերաբերյալ կոնվենցիաների նորմերը: Ինչպիսի՞ն է ԱԳՆ արձագանքն այդ ոճրագործությանը:

Պատասխան. - Նախ ցանկանում եմ խորին ցավակցություններ հայտնել Մանվել Սարիբեկյանի հարազատներին:

Երիտասարդ հովվի առեւանգումը, բռնության միջոցով ստիպելը հեռուստատեսությամբ ակնհայտ անհեթեթություններ ասել, եւ վերջիվերջո սպանելը զարհուրելի է թե իր էությամբ, թե ցինիզմի այն աստիճանով, ինչպես դա մատուցվեց հանրությանը:

Սա հայտնի ահաբեկիչներին բնորոշ գործելաոճ է. սկզբից պատանդին նվաստացնել տեսախցիկի առջեւ, ապա սպանել:

Քնած մարդկանց կացնահարողներին, գերիներին սպանողներին, մշակութային ժառանգությունը շարունակաբար ոչնչացնողներին հրահրողները եւ հերոսացնողները ՄԱԿ-ի ամբիոններից խոսում են հումանիտար իրավունքից, միգուցե, իրենց համար այդ բառն այլ իմաստ ունի:

Իհարկե, հասկանալի է, որ նման միջնադարյան մեթոդներով հարցեր չես կարող լուծել եւ հայտնի է, որ բռնությունը թուլության նշան է: