Ռ.Հակոբյան. Հարցս հետևյալն է. արդյոք ժամանակը չի, որ արտգործնախարարությունը պաշտոնապես արդեն ներկայացնի Մինսկի խմբին որպես պետության կողմից, արտգործնախարարության կողմից պահանջ, որպեսզի այդ խմբի պետությունները ճանաչեն Լեռնային Ղարաբաղի Հանրապետության անկախությունը և երկրորդը, թե խորհրդարանական, թե գործադիր դիվանագիտությունը, այդ թվում նաև ժողովրդական դիվանագիտությունը, որը մենք այսօր ունենք ի դեմս սփյուռքի, լայնամասշտաբ մարտավարական ծրագիր որդեգրենք այս միջազգային հասարակական կարծիքի ֆոնի վրա, որը կարծում եմ բացարձակ դրական է մեր նկատմամբ, այս հարցի նկատմամբ, որպեսզի աշխատանք տարվի, տոտալ աշխատանք տարվի Լեռնային Ղարաբաղի Հանրապետությունը միջազգայնորեն ճանաչելու համար:

Է. Նալբանդյան: Պարոն Հակոբյան, Դուք նշեցիք, որ միջազգային հանրության արձագանքը միանշանակ էր և մեզ համար այսօր ստեղծվել են բարենպաստ պայմաններ: Դա նաև ոչ թե վերջին այս օրերին մեր կողմից ձեռնարկված քայլերի արդյունք է, այլ նաև մեր քաղաքականության, որը վարում ենք այս տարիների ընթացքում: Եվ մենք պետք է հանգիստ շարունակենք այդ քաղաքականությունը, որն ըմբռնում է վայելում միջազգային հանրության կողմից, որը կարող է բերել նմանատիպ միահամուռ արձագանքին և Հայաստանի աջակցությանը:

Այն ինչ հրապարակայնորեն է արտահայտվել հայտնի է: Վերջին օրերի ընթացքում ես տասնյակ հեռախոսազանգեր եմ ստացել տարբեր երկրների արտգործնախարարներից , ներառյալ Եվրոպական Միության, որոնք իրենց լիակատար աջակություն են հայտնում մեր ջանքերին ըմբռնումը մեր վարած քաղաքականության վերաբերյալ:

Կարևոր է նաև այս պայմաններում չձեռնարկել այնպիսի քայլեր, որ մեր տակից խալին չքաշեն: Այնպես որ պետք է շատ զգույշ և ճիշտ ձևով շարունակենք այն քաղաքականությունը, որ մինչ այսօր վարել ենք, որը բերել է և բերում է կոնկրետ արդյունքներ, և միջազգային հանրություն իր աջակցությունն է հայտնում մեզ:

Երբ Լեռնային Ղարաբաղի հիմնախնդրի կարգավորման վերաբերյալ մենք ասում ենք, որ մեր դիրքորոշումը համահունչ է եռանախագահների մոտեցմանը, իսկ եռանախագահներն ունեն մանդատ միջազգային հանրության կողմից, առնվազն ԵԱՀԿ 56 երկրի կողմից և իրենք արտահայտում են նաև ոչ միայն իրենց, այլև միջազգային հանրության կարծիքը և մենք բազմիցս ենք ասել, որ վերջին այս տարիների ընթացքում մեր դիրքորոշումը համահունչ է համանախագահների մոտեցմանը, ավելին՝ եռանախագահների մոտեցումը համահունչ է մեր մոտեցմանը: Այնպես որ հանգիստ ձևով մենք պետք է շարունակենք այն ինչ արել ենք:

Ռ. Հակոբյան. Ես հասկանում եմ, որ դիվանագիտության շատ փոքր տոկոսն է, որ հրապարակային է, հիմնականում ստվերում է կատարվում և դա ճիշտ է, բայց նաև ասեմ այլ կարծիք, իմ ասածը ավելի շատ հռետորական հարց էր, ես համոզված եմ, որ այս պահին բացառիկ հնարավորություն է ստեղծվել մեր դիվանագիտության համար իսկապես միջազգային ատյաններում արդեն պետական դիրքորոշում ներկայացնելու և այս ֆոնի վրա Լեռնային Ղարաբաղի Հանրապետության ճանաչումը: Միակ պայմանը իմունիտետ տալ անկախ պետությանը դա միջազգային ճանաչումն է, որը պետք է սկսվի Հայաստանի Հանրապետության կողմից, շնորհակալություն:

Է.Նալբանդյան. Գիտեք, որ անցյալ մեր քննարկման ժամանակ ես ասացի, որ Հայաստանը շարունակելու է իր ջանքերը Լեռնային Ղարաբաղի հիմնախնդրի կարգավորման ուղղությամբ, Լեռնային Ղարաբաղի ժողովրդի ինքնորոշման իրավունքի ճանաչման, իրականացման եւ դրա միջազգային ճանաչման ուղղությամբ:

Սա է մեր բանակցությունների հիմքը և մեր բանակցությունների նպատակը և որևէ մեկը այլ կարծիք չի կարող ունենալ այս կապակցությամբ: Շնորհակալություն: