Արտգործնախարար Էդվարդ Նալբանդյանը ցավակցական հեռագիր է հղել՝ Քըրք Քըրքորյանի մահվան կապակցությամբ
17 հունիսի, 2015
Խոր վշտով տեղեկացա Մեծ Հայի՝ Քըրք Քըրքորյանի կյանքից հեռանալու մասին:
Սա անդառնալի կորուստ է աշխարհասփյուռ հայության համար, քանզի մեզնից հեռացել է մեծ անձնավորություն, մեծագույն Հայրենասեր, գթասիրտ մի մարդ, ով այդքան շատ բան է արել իր ժողովրդի, իր նախնյաց Հայրենիքի համար:
Քըրք Քըրքորյանի լայնածավալ և շարունակական աջակցությունը բացառիկ կարևորություն է ունեցել Հայաստանի զարգացման համար: 1988թ. ավերիչ երկրաշարժից անմիջապես հետո նրա կողմից ստեղծված Լինսի բարեգործական հիմնադրամը տարիներ շարունակ հսկայական ներդրումներ իրականացրեց Հայաստանում և Արցախում՝ կարևորագույն ծրագրերի իրականացման նպատակով:
Նա անմնացորդ սեր էր տածում իր ժողովրդի հանդեպ, իսկ ժողովուրդը փոխադարձեց նրան խորը հարգանքով և ակնածանքով: Նրան շնորհվեց Հայաստանի Ազգային հերոսի կոչում, և, իրավամբ, նա Հերոս էր:
Խորին ցավակցություններս եմ հայտնում Քըրքորյան ընտանիքին, հարազատներին, բարեկամներին և աշխարհասփյուռ հայությանը:
Քըրք Քըրքորյանի հիշատակը և անունը մշտապես վառ կմնան մեր սրտերում և մտքերում: