ԱԳ նախարար Էդվարդ Նալբանդյանի ելույթը եւ պատասխանները լրատվամիջոցների հարցերին Ռուսաստանի ԱԳ նախարար Սերգեյ Լավրովի հետ համատեղ մամուլի ասուլիսի ընթացքում

Շնորհակալություն: Նախեւառաջ կցանկանայի երախտագիտություն հայտնել Սերգեյ Վիկտորի Լավրովին հրավերի եւ ջերմ ընդունելության համար: Մենք, իսկապես, բավականին պարբերաբար եւ հաճախ ենք հանդիպում: Պարբերական հանդիպումներ են տեղի ունենում նաեւ մեր պետությունների ղեկավարների միջեւ. վերջին երեք տարիների ընթացքում երկու երկրների ղեկավարների միջեւ տեղի են ունեցել շուրջ երեք տասնյակ հանդիպումներ: Այսօր մենք լավ հնարավորություն ունեցանք քննարկելու ոչ միայն երկկողմ օրակարգին վերաբերող հարցերի լայն շրջանակ, այլ նաեւ երկու երկրների ղեկավարների միջեւ ձեռք բերված պայմանավորվածությունների իրականացման ընթացքը:

Մենք նշեցինք, որ այդ պայմանավորվածությունները իրականացվում են ամբողջապես, հարաբերությունները վերընթաց զարգացում են ապրում եւ հարստանում նոր բովանդակությամբ:

Մենք այսօր իրականացրեցինք մեր իրավապայմանագրային դաշտի ինվենտարիզացիա: Իսկ մենք ունենք երկկողմ հարաբերությունների բավականին ամուր իրավապայմանագրային հենք` շուրջ երկու հարյուր համաձայնագիր: Դրանցից ոմանք թարմացման կարիք ունեն:

Մենք նախապատրաստում ենք նաեւ նոր համաձայնագրերի նախագծեր բարձր մակարդակով առաջիկա հանդիպումների ընթացքում ստորագրելու համար:

Բանակցությունների ընթացքում մենք անդրադարձանք նաեւ մեր երկկողմ հարաբերությունների ռազմաքաղաքական ոլորտին: Շատ կարեւոր է, որ այսօր տեղի ունեցավ Հայաստանի տարածքում ռուսաստանյան ռազմակայանի տեղակայման մասին թիվ 5 արձանագրության վավերացման փաստաթղթերի փոխանակում: Այդ արձանագրությունը ստորագրվել էր Դմիտրի Անատոլիի Մեդվեդեւի Երեւան պետական այցի ընթացքում: Բավականին ոչ երկար, ես կասեի` անգամ կարճ ժամանակահատվածում իշխանության ոչ միայն գործադիր, այլ նաեւ օրենսդիր ճյուղերը շատ ներդաշնակորեն գործեցին, եւ այսօր մենք արդեն իսկ փոխանակում ենք վավերացման փաստաթղթերը: Եվ այսօրվանից արձանագրությունը մտնում է ուժի մեջ:

Մենք քննարկել ենք արտաքին քաղաքական գործունեության համադրման ուղղությամբ տարվող շատ հաջող համատեղ աշխատանքը: Հայաստանի եւ Ռուսաստանի արտաքին քաղաքական գերատեսչությունների միջեւ պարբերական խորհրդատվությունները իրականացվում են դեռեւս 1992թ. ստորագրված խորհրդատվությունների վերաբերյալ արձանագրության հիման վրա: Արդեն 20 տարի է անցել, մենք պայմանավորվել ենք թարմացնել այդ փաստաթուղթը, քանի որ շահագրգռված ենք միջազգային բեմահարթակում մեր արտաքին քաղաքական գերատեսչությունների առավել մեծ փոխգործակցությամբ:

Մենք անդրադարձել ենք մեր երկկողմ հարաբերությունների տնտեսական կողմին:

Տնտեսական ոլորտը դա լուրջ փոխշահավետ նախագծեր են, որոնք իրականացվում են, եւ նախատեսվում են նորերը: Բառացիորեն վաղը Դոնի Ռոստովում կայանալու է միջկառավական հանձնաժողովի նիստը, որը քննարկելու է նոր նախագծեր: Դա եւ տրանսպորտի, եւ էներգետիկայի, եւ հաղորդակցության ու կապի, եւ բարձր տեխնոլոգիաների ոլորտն է: Մեր տնտեսական հարաբերությունների ծավալը եւ խորությունը բավականին մեծ է: Հայաստանի տարածքում ռուսաստանյան կապիտալով գործում են մոտ մեկուկես հազար ձեռնարկություններ: Հայաստանում ռուսաստանյան ներդրումների ծավալը հասել է գրեթե երեք միլիարդ դոլարի: Մեզ մոտ լավ է ընթանում նաեւ միջտարածաշրջանային համագործակցությունը: Ապրիլին Հայաստանում տեղի է ունեցել միջտարածաշրջանային համագործակցության առաջին ֆորումը: Բավականին հաջող ֆորում է:

Իհարկե, մենք անդրադարձել ենք եւ դեռեւս կշարունակենք քննարկումները մի շարք միջազգային եւ տարածաշրջանային խնդիրների եւ, առաջին հերթին, մեր տարածաշրջանի շուրջ: Հատուկ ուշադրություն է դարձվել արցախյան հիմնահարցի կարգավորման գործընթացի շուրջ քննարկումներին: Հայաստանը բարձր է գնահատում Ռուսաստանի դերակատարությունը` որպես Մինսկի խմբի համանախագահի, Նախագահ Դմիտրի Անատոլիի Մեդվեդեւի անձնական ներդրումը եւ արտաքին գործերի նախարար Սերգեյ Վիկտորի Լավրովի ջանքերը ղարաբաղյան հիմնախնդրի` բացառապես խաղաղ կարգավորման ուղղությամբ:

Կցանկանայի եւս մեկ անգամ շնորհակալություն հայտնել հրավերի եւ ջերմ ընդունելության համար եւ իմ հերթին հրավիրել Սերգեյ Վիկտորի Լավրովին պաշտոնական այցով այցելել Հայաստան:

Հարց. Ձեր կարծիքով, որքանով է արդյունավետ ԵԱՀԿ Մինսկի խմբի ձեւաչափը: Չեք նախատեսում փոխել այն: Եթե այո, ապա ինչով փոխարինել: Դիտարկվում է արդյոք դրանում տարածաշրջանային այնպիսի երկրների մասնակցությունը, ինչպիսին են Թուրքիան կամ Իրանը:

Պատասխան. Իմ կողմից ես կցանկանայի միայն հավելել, որ իհարկե Մինսկի խումբը եւ հատկապես եռանախագահության ձեւաչափը բավականին արդյունավետ ձեւաչափ է: Այդ ձեւաչափում կուտակվել է բանակցային մեծ փորձ արցախյան հիմնախնդրի կարգավորման ուղղությամբ: Եվ գործընթացն այլ ձեւաչափ տեղափոխելու փորձերը իմաստ չունեն: Ինձ դուր եկավ Սերգեյ Լավրովի արտահայտությունը, որ այդ փորձերը «ետին մտքեր ունեն»: Կարծում եմ` հենց այդպես է: Քննարկումները տարբեր խորհրդարանական վեհաժողովներ կամ անգամ ՄԱԿ-ի Գլխավոր ասամբլեա տեղափոխելու փորձերը անիմաստ են: Ընդհանուր առմամբ, որեւէ խորհրդարանական վեհաժողովում, անգամ ՄԱԿ Գլխավոր ասամբլեայում որեւէ հակամարտություն չի լուծվել: Անհրաժեշտություն չկա փոխելու գոյություն ունեցող ձեւաչափը: Մենք կիսում ենք համանախագահների այն տեսակետը, որ պետք է շարունակել հենց գոյություն ունեցող ձեւաչափերով, որը բավականին արդյունավետ է բանակցային գործընթացի համար: