Հունվարի 29-ին պաշտոնական կարճատեւ այցով Օսլոյում գտնվող Հայաստանի արտգործնախարար Էդվարդ Նալբանդյանը հանդիպում ունեցավ իր նորվեգացի գործընկեր Յոնաս Գահր Շտյորեի հետ:

Առանձնազրույցի, ապա աշխատանքային ճաշի ընթացքում նախարարները քննարկեցին երկկողմ հարաբերությունների զարգացման ուղղությամբ ձեռնարկվելիք քայլերը, տարածաշրջանային եւ միջազգային հարցեր:

Նախարարներն ընդգծեցին Հայաստանի եւ Նորվեգիայի միջեւ տարբեր ոլորտներում համագործակցությունը խթանելու անհրաժեշտությունը, մասնավորապես բարձրաստիճան այցերի կազմակերպումը, երկու երկրների ԱԳՆ-ների միջեւ կանոնավոր խորհրդակցությունների անցկացումը, իրավապայմանագրային դաշտի ձեւավորումը, մշակութային, կրթական եւ գիտական ոլորտներում փոխանակումների ակտիվացումը:

Հայաստանի եւ Նորվեգիայի արտաքին քաղաքական գերատեսչությունների ղեկավարները հանգամանալից քննարկեցին առեւտրատնտեսական ոլորտում փոխգործակցությունը աշխուժացնելու հնարավորությունը եւ պայմանավորվեցին հավելյալ ջանքեր գործադրել այդ ուղղությամբ:

Նախարար Շտյորեն ներկայացրեց իր երկրի արտաքին քաղաքականության առաջնահերթություները, սկանդինավյան երկրների համագործակցության փորձը, նշելով, որ այն կարող է կիրառվել նաեւ այլ տարածաշրջանների համար: Այս ենթատեքստում նախարար Նալբանդյանն ընգծեց, որ ածխաջրածնային պաշարներով աշխարհում առաջատար դիրքեր զբաղեցնող եւ աշխարհի ամենախաղաղ երկիրը համարվող Նորվեգիայի քաղաքականությունը եւ միջազգային անվտանգության ամրապնդմանն ուղղված գործունեությունը կարող են օրինակելի լինել նման պաշարներ ունեցող այլ երկրների համար:

Հայաստանի արտգործնախարարը Նորվեգիայի ԱԳ նախարարին ներկայացրեց Հայաստանի արտաքին քաղաքականության հիմնական ուղղություններն ու առաջնահերթությունները` կովկասյան տարածաշրջանում անվտանգության եւ կայունության ապահովմանն ուղղված Հայաստանի ջանքերը, Եվրոպական ընտանիքին մերձենալու արտաքին քաղաքական ուղեգիծը եւ այդ ուղղությամբ ձեռնարկվող քայլերը, արցախյան հիմնախնդրի կարգավորման բանակցությունների վերջին զարգացումները, Հայաստանի եւ Թուրքիայի միջեւ հարաբերությունների հաստատման ՀՀ Նախագահի նախաձեռնությունը եւ այդ ուղղությամբ գործադրվող ջանքերը:

Նախարարներ Նալբանդյանն ու Շտյորեն անդրադարձան նաեւ ԵԱՀԿ օրակարգային հարցերին:

Էդվարդ Նալբանդյանն ու Յոնաս Գահր Շտյորեն ստորագրեցին Հայաստանի եւ Նորվեգիայի միջեւ Ռեադմիսիայի մասին համաձայնագիրը:

Հանդիպման արդյունքներով ընդունվեց մամուլի համատեղ հայտարարություն:

Նույն օրը ՀՀ արտգործնախարարը հյուրըկալվեց Նորվեգիայի միջազգային հարաբերությունների ինստիտուտում, որտեղ հանդես եկավ Հայաստանի արտաքին քաղաքականության մասին ծավալուն ելույթով, որին ներկա էին Օսլոյում հավատարմագրված դեսպաններ, ԱԳՆ բարձրաստիճան պաշտոնյաներ, քաղաքագետներ: Ելույթից հետո նախարար Նալբանդյանը պատասխանեց ներկաների, այդ թվում Թուրքիայի եւ Ադրբեջանի դեսպանների հարցերին:

Օսլոյում Էդվարդ Նալբանդյանը այցելեց նաեւ Ֆրիտյոֆ Նանսենի տանը տեղակայված Նանսենի ինստիտուտ, ուր ծանոթացավ նրա աշխատանքներին, հանդիպում ունեցավ ինստիտուտի ղեկավարության հետ: Վերջինս ներկայացրեց Ֆրիտյոֆ Նանսենի 150-ամյակի միջացառումների նախապատրաստական աշխատանքները: Նախարար Նալբանդյանն առաջարկեց ինստիտուտին Նանսենի հոբելյանին նվիրված համատեղ միջոցառումներ կազմակերպել Հայաստանում:

Նախարարը ծաղկեպսակ դրեց Նանսենի շիրմաքարին եւ գրառում կատարեց պատվավոր հյուրերի գրքում:

Հայաստանի արտգործնախարարի Օսլո այցի ծրագիրը ներառում էր նաեւ տնտեսական բաղադրիչ` հունվարի 29-ի երեկոյան Էդվարդ Նալբանդյանը հանդիպում ունեցավ նորվեգացի գործարարների հետ, որոնց ներկայացրեց Հայաստանում նոր տնտեսական ծրագրերի իրականացման հնարավորությունները:

Նախարար Նալբանդյանը նաեւ ծավալուն հարցազրույցներ տվեց Նորվեգիայի պետական "NRK" հեռուստաընկերությանը եւ առաջատար "Aftenposten" թերթին:

Հունվարի 30-ի վաղ առավոտյան նախարար Նալբանդյանը ուղեւորվեց Երեւան:

Հայաստանի Հանրապետության եւ Նորվե•իայի Թա•ավորությանԱԳ նախարարների համատեղ հայտարարությունը

2010 թ. հունվարի 29-ին Ն.Գ. ԱԳ նախարար Էդվարդ Նալբանդյանը պաշտոնական այց կատարեց Նորվեգիա, որի ընթացքում քաղաքական բանակցություններ վարեց ԱԳ Նախարար Յոնաս Գահր Շտյորեի հետ: Նախարարներն անդրադարձան հարցերի լայն շրջանակի, որոնց շարքում էին երկկողմ հարաբերությունները, Հարավային Կովկասի տարածաշրջանում իրավիճակին, ինչպես նաեւ` Եվրոպական ինտեգրմանը եւ համագործակցությանը, փոխադարձ հետաքրքրություն ներկայացնող այլ հարցերի:

Հայտնելով երկկողմ հարաբերությունները հետագայում եւս զարգացնելու փոխադարձ ցանկությունը, նախարարները համաձայնեցին ակտիվացնել քաղաքական երկխոսությունը, այդ թվում` երկու ԱԳՆ-երի միջեւ երկկողմ խորհրդատվությունները, իրավապայմանագրային դաշտի ընդլայնման եւ հումանիտար կապերի նոր հնարավորությունների բացահայտման միջոցով: Նախարարները շեշտեցին Հայաստանի եւ Նորվեգիայի միջեւ տնտեսական համագործակցության եւ մշակութային կապերի կարեւորությունը:

Նախարարները ստորագրեցին ռեադմիսիայի մասին երկկողմ համաձայնագիր: «Հարաճուն շարժունակության եւ միգրացիայի դարաշրջանում այս համաձայնագիրը երկու պետությունների միջեւ հարաբերությունների կարեւոր մաս է կազմում», - ասաց ԱԳ նախարար Շտյորը:

Նախարար Նալբանդյանը հրավիրեց իր նորվեգացի գործընկերոջը պաշտոնական այց կատարել Հայաստան: «Մենք կարեւորում ենք մեր հարաբերությունները Նորվեգիայի հետ եւ ձգտում ենք համագործակցությունը բարձրացնել նոր մակարդակի», - ասաց նախարար Նալբանդյանը:

Նախարար Շտյորեն ողջունեց Հայաստանի եւ Թուրքիայի ջանքերն` ուղղված երկկողմ հարաբերությունների կարգավորմանը, այդ թվում` սահմանի բացումը եւ դիվանագիտական հարաբերությունների հաստատումը:

Նախարարները նաեւ մտքեր փոխանակեցին ԼՂ խաղաղ գործընթացի վերաբերյալ: Նախարար Շտյորը վերահաստատեց Նորվեգիայի լիակատար աջակցությունը ԵԱՀԿ Մինսկի խմբի ջանքերին` ուղղված հիմնախնդրի խաղաղ լուծմանը:

Նախարարները հաստատեցին իրենց հավատարմությունը հետագա բանակցությունների ձեւաչափին, ինչպես արտացոլված է 2009թ. ԵԱՀԿ արտգործնախարարների խորհրդի աթենքյան հայտարարության մեջ: Արտաքին գործերի նախարար Նալբանդյանը հանդես եկավ ելույթով Նորվեգիայի միջազգային հարաբերությունների ինստիտուտում եւ այցելեց հանրահայտ նորվեգացի բեւեռախույզ, դիվանագետ ու հումանիստ Ֆրիտյոֆ Նանսենի տուն-թանգարան: