ՀՀ ԱԳ նախարար Էդվարդ Նալբանդյանի եւ Տաջիկստանի ԱԳ նախարար Համրոխոն Զարիֆիի հանդիպումը
20 օգոստոսի, 2010Օգոստոսի 20-ին կայացավ ՀՀ ԱԳ նախարար Էդվարդ Նալբանդյանի եւ Տաջիկստանի ԱԳ նախարար Համրոխոն Զարիֆիի հանդիպումը:
Հանդիպման ժամանակ Էդվարդ Նալբանդյանն ու Համրոխոն Զարիֆին գոհունակությամբ նշեցին, որ երկու երկրների միջեւ ձեւավորված հարաբերությունների մակարդակը լայն հնարավորություններ է ստեղծում տարբեր բնագավառներում Հայաստանի եւ Տաջիկստանի միջև արդյունավետ համագործակցության խորացման եւ ընդլայնման համար: Կողմերը վերահաստատեցին երկկողմ պատրաստակամություն քայլեր ձեռնարկել այդ ուղղությամբ:
Նախարարները կարեւորեցին միջազգային կազմակերպությունների շրջանակներում Հայաստանի եւ Տաջիկստանի փոխգործակցության խորացումը:
Նախարարներն ընդգծեցին երկու երկրների միջեւ տնտեսական ներուժի կիրառման, գործարար շրջանակների միջեւ հարաբերությունների խորացման անհրաժեշտությունը: Կողմերը համաձայնվեցին, որ անհրաժեշտ է քայլեր ձեռնարկել Հայաստանի Հանրապետության եւ Տաջիկստանի միջեւ իրավա-պայմանագրային դաշտի ընդլայնման եւ թարմացման առումներով:
Էդվարդ Նալբանդյանն ու Համրոխոն Զարիֆին անդրադարձան Կենտրոնական Ասիայի եւ Հարավային Կովկասի տարածաշրջանային զարգացումներին: