Կայացավ Հայաստանի եւ Ուկրաինայի արտաքին գործերի նախարարների հանդիպումը
11 փետրվարի, 2011Փետրվարի 11-ին կայացավ արտգործնախարար Էդվարդ Նալբանդյանի եւ պաշտոնական այցով Երեւան ժամանած Ուկրաինայի արտաքին գործերի նախարար Կոնստանտին Գրիշչենկոյի հանդիպումը:
Ողջունելով իր ուկրաինացի գործընկերոջը՝ նախարար Նալբանդյանը նշեց, որ անցյալ տարի հայ-ուկրաինական հարաբերություններում արձանագրված դրական դինամիկան լավ հիմքեր է ստեղծում երկու բարեկամ ժողովուրդների եւ երկրների միջեւ համագործակցության հետագա խորացման համար:
Կոնստանտին Գրիշչենկոն, շնորհակալություն հայտնելով Երեւան այցելելու հրավերի եւ ջերմ ընդունելության համար, համոզմունք հայտնեց, որ իր այցելությունը Հայաստան նոր լիցք կհաղորդի երկու երկրների միջեւ փոխգործակցության համակողմանի զարգացմանը:
Կողմերը գոհունակությամբ ընդգծեցին, որ հայ-ուկրաինական փոխհարաբերությունների առավել ամրապնդման եւ նոր մակարդակի բարձրացման համար առկա են փոխադարձ վճռականություն եւ բոլոր հնարավորությունները:
Հայաստանի եւ Ուկրաինայի արտաքին քաղաքական գերատեսչությունների ղեկավարներն անդրադարձան ՀՀ Նախագահի՝ Ուկրաինա կատարելիք այցի նախապատրաստական աշխատանքներին:
Հանդիպման ընթացքում քննարկվեցին նաեւ միջազգային կազմակերպությունների շրջանակներում երկու երկրների համագործակցության հարցեր: Զրուցակիցները նշեցին, որ Հայաստանի եւ Ուկրաինայի միջեւ գոյություն ունի ընդարձակ իրավապայմանագրային դաշտ, որը հարկավոր է ընդլայնել նոր փաստաթղթերով:
Նախարարները մանրամասնորեն քննարկեցին հայ-ուկրաինական տնտեսական համագործակցության միջկառավարական հանձնաժողովի աշխատանքներին առնչվող հարցեր՝ կարեւորելով այդ կառույցի պարբերական նիստերի անցկացումն ու արդյունավետության բարձրացումը:
Հայաստանի եւ Ուկրաինայի արտգործնախարարները անդրադարձան նաեւ այս տարի Ուկրաինայի Գերագույն Ռադայի ղեկավարի եւ վարչապետի` Հայաստան կատարելիք այցելություններին:
Էդվարդ Նալբանդյյան ու Կոնստանտին Գրիշչենկոն պայմանավորվեցին միջխորհրդարանական համագործակցության ակտիվացման, ապակենտրոնացված փոխգործակցության խրախուսման, հումանիտար բնագավառի փոխանակումների, արտգործնախարարությունների միջեւ խորհրդատվությունների անցկացման շուրջ: Այս ենթատեքստում կարեւորվեց այս տարի Ուկրաինայում Հայաստանի մշակութային օրերի անցակցումը:
Հանդիպման ընթացքում անդրադարձ կատարվեց տարածաշրջանային խնդիրներին:
Ուկրաինայի ԱԳ նախարարի խնդրանքով նախարար Նալբանդյանը ներկայացրեց արցախյան հիմնախնդրի կարգավորման գործընթացի վերջին զարգացումները: 2013 թ. ԵԱՀԿ-ում Ուկրաինայի նախագահության համատեքստում ընգծվեց ղարաբաղյան հիմնախնդրի կապակցությամբ ԵԱՀԿ Մինսկի խմբի շարունակաբար հնչեցվող դիրքորոշմանը համահունչ փոխգործակցությունը:
Հանդիպումից հետո նախարարները ստորագրեցին 2011-2012 թթ. հայ- ուկրաինական համագործակցության ծրագիրը, ինչպես նաեւ ՀՀ ԱԳՆ Դիվանագիտական դպրոցի եւ Ուկրաինայի ԱԳՆ-ին կից Դիվանագիտական ակադեմիայի միջեւ համագործակցության հուշագիրը:
Ստորագրման արարողությանը հետեւեց երկու նախարարների մամուլի ասուլիսը: