ԱԳ նախարարն ընդունեց ԱՄՆ պետքարտուղարի փոխտեղակալին և Հարավային Կովկասի երկրներում ԱՄՆ դեսպաններին
10 դեկտեմբերի, 2013Դեկտեմբերի 10-ին ԱԳ նախարար Էդվարդ Նալբանդյանն ընդունեց ԱՄՆ պետքարտուղարի փոխտեղակալ Էրիկ Ռուբինին, Հայաստանում ԱՄՆ դեսպան Ջոն Հեֆֆերնին, Վրաստանում ԱՄՆ դեսպան Ռիչարդ Նորլանդին և Ադրբեջանում ԱՄՆ դեսպան Ռիչարդ Մորնինգստարին, որոնք Երևան են ժամանել Հարավային Կովկասի երկրներում ԱՄՆ դեսպանների խորհրդակցությանը մասնակցելու նպատակով։
Ողջունելով հյուրերին նախարար Նալբանդյանը գոհունակությամբ նշեց, որ հայ-ամերիկյան բարեկամական գործընկերությունը համատեղ ջանքերի շնորհիվ վերջին տարիներին որակական նոր փուլ է թևակոխել և առկա են անհրաժեշտ պայմանները դրանց առավել ընդլայնման համար։
Շնորհակալություն հայտնելով ընդունելության համար Էրիկ Ռուբինն ասաց, որ Միացյալ Նահանգները կարևորում են Հայաստանի հետ համակողմանի փոխգործակցության զարգացումը։
Հանդիպմանը անդրադարձ կատարվեց հայ-ամերիկյան գործընկերության ամրապնդման նպատակով ձեռնարկվող քայլերին, ամփոփվեցին նոյեմբերին Վաշինգտոնում կայացած հայ-ամերիկյան տնտեսական համագործակցության հանձնաժողովի նիստի արդյունքները, կարևորվեց մուտքի արտոնագրային ռեժիմի դյուրացման վերաբերյալ պայմանավորվածության իրագործումը։
Զրույցի ընթացքում անդրադարձ կատարվեց ղարաբաղյան հիմնախնդրի կարգավորման գործընթացի վերջին զարգացումները, արծարծվեցին նաև միջազգային և տարածաշրջանային խնդիրներ։