Հայաստանի արտգործնախարարն ընդունեց Չինաստանի ԱԳՆ հատուկ բանագնացին
15 հունիսի, 2015
Հունիսի 15-ին Հայաստանի արտաքին գործերի նախարար Էդվարդ Նալբանդյանն ընդունեց Չինաստանի արտգործնախարարության հատուկ բանագնաց, Հայաստանում Չինաստանի առաջին դեսպան Ճաո Սիդիին:
Ողջունելով հյուրին՝ նախարար Նալբանդյանը խորհրդանշական համարեց Հայաստանում Չինաստանի առաջին դեսպանի այցը Հայաստան՝ որպես Չինաստանի ԱԳՆ հատուկ բանագնաց՝ կարևորելով այն հանգամանքը, որ դեսպանը առ այսօր իր նպաստն է բերում հայ-չինական բարեկամության ամրապնդմանը:
Շնորհակալություն հայտնելով ընդունելության համար՝ դեսպան Սիդին Էդվարդ Նալբանդյանին փոխանցեց Չինաստանի արտգործնախարար Վան Իի ողջույնները և նշեց, որ ուրախ է կրկին գտնվել Հայաստանում՝ որպես Չինաստանի ԱԳՆ հատուկ բանագնաց։
Զրուցակիցները, բարձր գնահատելով Հայաստանի և Չինաստանի միջև դինամիկ զարգացող հարաբերությունները, նշեցին, որ ս.թ. մարտին ՀՀ Նախագահի՝ Չինաստան կատարած պետական այցելությունը նոր լիցք հաղորդեց բազմաոլորտ հայ-չինական համագործակցությանը։
Հայաստանի արտգործնախարարը շնորհակալություն հայտնեց անկախությունից ի վեր Հայաստանին Չինաստանի կողմից տրամադրվող շարունակական աջակցության համար:
Զրուցակիցները մտքեր փոխանակեցին միջազգային կազմակերպություններում փոխգործակցության շուրջ, անդրադարձան ՄԱԿ-ի բարեփոխումների գործընթացին:
Նախարար Նալբանդյանը ներկայացրեց ղարաբաղյան հիմնահարցի կարգավորմանն ուղղված ջանքերը: Այս համատեքստում դեսպան Սիդին վերահաստատեց Չինաստանի աջակցությունը խնդրի խաղաղ կարգավորմանն ուղղված ջանքերին: