Փոխնախարար Նազարյանը մասնակցեց Արևելյան գործընկերության ավագ պաշտոնյաների հանդիպմանը Բրյուսելում
23 նոյեմբերի, 2015
Նոյեմբերի 23-ին Բրյուսելում կայացավ ԵՄ Արևելյան գործընկերության (ԱլԳ) ավագ պաշտոնյաների հերթական հանդիպումը, որին մասնակցեցին վեց գործընկեր երկրների և ԵՄ անդամ պետությունների ներկայացուցիչներ։
ՀՀ պատվիրակությունն այս ամենամյա հանդիպմանը գլխավորում էր ԱԳ նախարարի տեղակալ Կարեն Նազարյանը։
Եվրոպական Արտաքին հարաբերությունների ծառայության նորանշանակ տնօրեն Թոմաս Մեյր֊Հարթինգի նախագահությամբ անցած հանդիպման նպատակն էր քննարկել Արևելյան գործընկերության Ռիգայի գագաթաժողովի արդյունքներից բխող քայլերը և Եվրոպական հարևանության քաղաքականության (ԵՀՔ) վերանայման գործընթացը։
ԱԳ նախարարի տեղակալ Կարեն Նազարյանն իր ելույթում գոհունակությամբ նշեց, որ Հայաստանի կողմից արված առաջարկություններն արտացոլվել են ԵՀՔ վերանայման փաստաթղթում, մասնավորապես, ԵՄ կողմից գործընկեր պետությունների նկատմամբ տարբերակված մոտեցման որդեգրումը, ինչը հնարավորություն կտա լիովին օգտագործել կողմերի ներուժն ու կարողությունները՝ փոխադարձ հետաքրքրություն ներկայացնող բոլոր ոլորտներում ԵՄ-ի հետ համագործակցությունը առաջ մղելու համար։
Հայաստանի արտգործնախարարի տեղակալը կարևորեց տարբեր ինտեգրացիոն գործընթացների միջև համագործակցության խթանումը։
Հանդիպմանն անդրադարձ կատարվեց նաև Հայաստան-ԵՄ հարաբերություններում վերջին զարգացումներին, այդ թվում՝ նոր իրավական փաստաթղթի շուրջ Երևանի և Բրյուսելի միջև մեկնարկելիք բանակցություններին ու ԵՄ մի շարք ծրագրերին Հայաստանի մասնակցության հետ կապված հարցեր։
Հանդիպման մասնակիցները նաև մտքեր փոխանակեցին Թբիլիսիում նոյեմբերի 26-ին կայանալիք ԱլԳ անդամ երկրների արտգործնախարարների ոչ-պաշտոնական երկխոսության օրակարգին։