Կորեայի Հանրապետության նորանշանակ դեսպանն իր հավատարմագրերի պատճենը հանձնեց Հայաստանի արտգործնախարարին
14 դեկտեմբերի, 2015
Դեկտեմբերի 14-ին Հայաստանում Կորեայի Հանրապետության նորանշանակ դեսպան Պակ Նո Փյոկը (նստավայրը` Մոսկվա) իր հավատարմագրերի պատճենը հանձնեց արտգործնախարար Էդվարդ Նալբանդյանին։
Ողջունելով հյուրին՝ նախարար Նալբանդյանը հաջողություն մաղթեց դեսպանին իր առաքելության մեջ՝ հույս հայտնելով, որ դեսպանն իր կարևոր ներդրումը կունենա երկկողմ հարաբերությունների զարգացման և երկկողմ համագործակցության ընդլայնման գործում։
Կորեայի դեսպանը, շնորհակալություն հայտնելով ընդունելության և բարեմաղթանքների համար, հավաստիացրեց, որ պաշտոնավարման ընթացքում կանի առավելագույնը հայ-կորեական համագործակցության ամրապնդման և խորացման համար։
Էդվարդ Նալբանդյանը բարձր գնահատեց Կորեայի հետ դինամիկ զարգացող գործընկերությունը՝ երախտագիտություն հայտնելով անկախությունից ի վեր Հայաստանի զարգացմանը Կորեայի կողմից ցուցաբերած տեխնիկական աջակցության համար։
Նախարար Նալբանդյանը և դեսպան Պակ Նո Փյոկը անդրադարձան քաղաքական, տնտեսական, կրթական և մշակութային համագործակցության, ինչպես նաև իրավապայմանագրային դաշտի ընդլայնմանն առնչվող հարցերի լայն շրջանակի։ Երկուստեք կարևորվեց բարձրաստիճան այցելությունների կազմակերպումը, արտգործնախարարությունների միջև խորհրդակցությունների անցկացումը։
Հանդիպման ընթացքում երկուստեք կարևորվեց Կորեա-Հայաստան խորհրդարանական բարեկամության խմբի ակտիվ գործունեությունն՝ ուղղված երկկողմ հարաբերությունների առավել ամրապնդմանը։
Հայաստանի արտաքին քաղաքական գերատեսչության ղեկավարը շնորհակալություն հայտնեց Կորեայի խորհրդարանում Հայոց ցեղասպանության 100-րդ տարելիցի կապակցությամբ կազմակերպած միջոցառման համար։
Զրուցակիցները մտքեր փոխանակեցին մի շարք միջազգային և տարածաշրջանային խնդիրների և դրանց լուծման ուղիների շուրջ։ Դեսպան Պակ Նո Փյոկը ներկայացրեց կորեական թերակղզում խաղաղության և կայունության ամրապնդման ուղղությամբ գործադրվող ջանքերը։
Էդվարդ Նալբանդյանը հյուրին ներկայացրեց ղարաբաղյան հիմնախնդրի խաղաղ կարգավորման ուղղությամբ Հայաստանի և ԵԱՀԿ Մինսկի խմբի համանախագահների կողմից գործադրվող ջանքերը։