Դեկտեմբերի 23-ին Եգիպտոսի Արաբական Հանրապետության նորանշանակ դեսպան Տարեկ Իբրահիմ Մուհամմադ Մաաթին իր հավատարմագրերի պատճենը հանձնեց Հայաստանի Հանրապետության արտգործնախարար Էդվարդ Նալբանդյանին:

Շնորհավորելով դեսպանին նշանակման կապակցությամբ` ՀՀ ԱԳ նախարարը հույս հայտնեց, որ նա իր ներդրումը կունենա Հայաստանի և Եգիպտոսի միջև ավանդական բարեկամական հարաբերությունների առավել խորացման գործում: Էդվարդ Նալբանդյանը դեսպան Մաաթիին հաջողություն մաղթեց իր առաքելությունում:

Շնորհակալություն հայտնելով բարեմաղթանքների համար՝ Եգիպտոսի դեսպանն իր հերթին շեշտեց, որ Եգիպտոսը մեծ կարևորություն է տալիս Հայաստանի հետ հարաբերությունների առավել սերտացմանը և համագործակցության զարգացմանը:

Հայաստանի արտգործնախարարը և Եգիպտոսի դեսպանն անդրադարձան հայ-եգիպտական փոխգործակցության օրակարգային հարցերին: Նրանք կարևորեցին գալիք տարում հայ-եգիպտական միջկառավարական հանձնաժողովի նիստի գումարումը Երևանում: Երկուստեք նշվեց Եգիպտոսի հայ համայնքի կապող դերը երկու երկրների և ժողովուրդների միջև:

Նախարար Նալբանդյանը և դեսպան Մաաթին մտքեր փոխանակեցին միջազգային և տարածաշրջանային հրատապ հարցերի շուրջ, քննարկեցին Մերձավոր Արևելքում տիրող իրավիճակը: Կողմերը համակարծիք էին, որ հրամայական է միջազգային ջանքերի համախմբումը՝ ահաբեկչության դեմ արդյունավետ պայքար մղելու համար: