Արտգործնախարար Էդվարդ Նալբանդյանը հանդիպեց Բրազիլիայի արտգործնախարար Մաուրո Վիեյրային
13 փետրվարի, 2016
Փետրվարի 13-ին Հայաստանի արտգործնախարար Էդվարդ Նալբանդյանը Մյունխենում հանդիպեց Բրազիլիայի արտգործնախարար Մաուրո Վիեյրային:
Զրուցակիցները կարևորեցին քաղաքական բարձր մակարդակով երկխոսության ակտիվացումը, արտաքին գործերի նախարարությունների միջև պարբերական խորհրդատվությունների անցկացումը, գործարար կապերի խթանումը:
Հանդիպմանն անդրադարձ արվեց առևտրատնտեսական, մշակութային ոլորտներում համագործակցության սերտացմանը: Նախարարները գոհունակությամբ համոզմունք հայտնեցին, որ երկու պետությունների միջև ուժի մեջ մտած մուտքի արտոնագրային ռեժիմի ազատականացումը կնպաստի հասարակությունների մերձեցմանը, տուրիզմի խթանմանը: Այս առումով երկուստեք կարևորվեց բրազիլահայ համայնքի դերակատարությունը։
Հայաստանի և Բրազիլիայի արտգործնախարարները քննարկեցին միջխորհրդարանական կապերի, միջազգային կազմակերպություններում փոխգործակցության սերտացմանն առնչվող հարցեր:
Էդվարդ Նալբանդանը շնորհակալություն հայտնեց անցյալ տարի Բրազիլիայի Սենատի կողմից Հայոց ցեղասպանությունը ճանաչող բանաձևի ընդունման համար։
Էդվարդ Նալբանդյանը Բրազիլիայի իր գործընկերոջը հրավիրեց այցելել Հայաստան։