Նոյեմբերի 1-2-ին ՀՀ արտաքին գործերի նախարարության նախաձեռնությամբ և Համաշխարհային բանկի խմբի (ՀԲԽ) անդամ Միջազգային ֆինանսական կորպորացիայի աջակցությամբ ՀՀ ԱԳՆ-ում տեղի ունեցավ «Տնտեսական դիվանագիտություն» թեմայով երկօրյա սեմինար-աշխատանքային քննարկում:

Սեմինարին ողջույնի խոսքով հանդես եկավ ՀՀ ԱԳ նախարարի տեղակալ Ռոբերտ Հարությունյանը:

ՀԲԽ-ի փորձագետներ՝ Վիեննայի գրասենյակի առևտրի և մրցունակության գծով ղեկավար Իվան Անտոն Նիմացը, համաշխարհային ներդրումների խթանման մասնագետ Ռոբերտ Ուայթը և ներդրումների գծով աշխատակից Յանա Կրայցովիչովան ներկայացրին միջազգային տնտեսական դիվանագիտության առանձնահատկությունները, քաղաքական և ինստիտուցիոնալ շրջանակները, ներդրումների ներգրավման և ներդրումային քաղաքականության իրականացման մեթոդները և դիվանագետների դերը այդ գործընթացում: Փորձագետները հանգամանալից անդրադարձ կատարեցին ներդրումների խրախուսման լավագույն գործելակերպերին, ոլորտի մրցունակությանը, օտարերկրյա ներդրումների ազգային ռազմավարությանը, ներդրումների խթանման գործում պետական կառույցների դերին և լիազորությունների շրջանակին, ներդրողների շրջանում իրազեկության բարձրացմանը և հետաքրքրություն առաջացնելու, ինչպես նաև հետաքրքրությունը ներդրում կատարելու որոշման վերածելու մեթոդներին: Սեմինարի օրակարգում էին նաև մոնիտորինգի և գնահատման համակարգը, ներդրողների հետ հարաբերությունների կառավարման համակարգը, բողոքների կարգավորումը և ոլորտին վերաբերող այլ թեմաներ:

Միջոցառմանը մասնակցում էին ՀՀ ԱԳՆ, ՀՀ տնտեսական զարգացման և ներդրումների նախարարության և Հայաստանի զարգացման հիմնադրամի ներկայացուցիչները: