Հայաստանի և Վրաստանի արտգործնախարարների հանդիպումը
02 մարտի, 2018
Մարտի 2-ին արտաքին գործերի նախարար Էդվարդ Նալբանդյանը հանդիպեց Վրաստանի վարչապետի գլխավորած պատվիրակության կազմում Երևան ժամանած Վրաստանի փոխվարչապետ, արտգործնախարար Միխեիլ Ջանելիձեին
Նախարարները գոհունակությամբ արձանագրեցին, որ բարձր մակարդակով հայ-վրացական մշտական շփումները հնարավորություն են ընձեռում վերահսկելու ձեռք բերված պայմանավորվածությունների իրագործման ընթացքն ու նախանշելու նոր ծրագրեր։
Էդվարդ Նալբանդյանն ու Միխեիլ Ջանելիձեն քննարկեցին Հայաստանի և Վրաստանի ԱԳՆ-ների միջև պարբերական խորհրդատվությունների անցկացման, միջազգայն կառույցների շրջանակներում փոխգործության սերտացման, իրավապայմանագրային դաշտի ընդլայնման, միջկառավարական հանձնաժողովի հերթական նիստի անցկացմանն առնչվող հարցեր։
Հայաստանի և Վրաստանի արտաքին քաղաքական գերատեսչությունների ղեկավարները անդրադարձան տարածաշրջանային ու միջազգային հրատապ մի շարք խնդիրների: