Հայաստանի արտգործնախարարն ընդունեց Իռլանդիայի նորանշանակ դեսպանին
26 մարտի, 2018Մարտի 26-ին արտգործնախարար Էդվարդ Նալբանդյանն ընդունեց Հայաստանում Իռլանդիայի նորանշանակ դեսպան Մայքլ Ֆորբսին (նստավայրը՝ Սոֆիա)՝ հավատարմագրերի պատճենի հանձնման կապակցությամբ:
Շնորհավորելով Մայքլ Ֆորբսին` նախարար Նալբանդյանը հույս հայտնեց, որ նորանշանակ դեսպանն իր նպաստը կբերի հայ-իռլանդական հարաբերությունների առավել խորացմանը և ամրապնդմանը:
Շնորհակալություն հայտնելով ընդունելության համար՝ դեսպան Ֆորբսը հավաստիացրեց, որ իր պաշտոնավարման ընթացքում կներդնի առավելագույն ջանքերը հայ-իռլանդական հարաբերություններին նոր լիցք հաղորդելու համար:
Հանդիպման ընթացքում Էդվարդ Նալբանդյանը և Մայքլ Ֆորբսը քննարկեցին երկկողմ օրակարգի հարցեր, անդրադարձան քաղաքական երկխոսության ակտիվացման և առևտրատնտեսական կապերի զարգացման ուղղությամբ համատեղ քայլերին, ընդգծեցին միջխորհրդարանական կապերի ակտիվացման, իրավապայմանագրային դաշտի ընդլայնման, մշակույթային փոխանակումների խթանման կարևորությունը:
Երկուստեք նշվեց, որ Հայաստան-Եվրամիություն Համապարփակ և ընդլայնված գործընկերության համաձայնագրի ստորագրումը կարող է հնարավորություններ ընձեռել ինչպես Հայաստան-ԵՄ ձևաչափում, այնպես էլ երկկողմ հարաբերությունների առավել խորացման և ընդլայնման համար:
Նախարար Նալբանդյանը դեսպան Ֆորբսին ներկայացրեց ղարաբաղյան հիմնախնդրի խաղաղ կարգավորմանն ուղղված Հայաստանի և ԵԱՀԿ Մինսկի խմբի համանախագահ երկրների համատեղ ջանքերը: