Սեպտեմբերի 27-ին, Նյու Յորքում, ՄԱԿ-ի Գլխավոր ասամբլեայի 73-րդ նստաշրջանի շրջանակներում, տեղի ունեցավ ընդունելություն Հայաստանի արտաքին գործերի նախարար Զոհրաբ Մնացականյանի և Ֆրանկոֆոնիայի միջազգային կազմակերպության գլխավոր քարտուղար Միկաել Ժանի անունից:

Միջոցառմանը ողջույնի խոսքով հանդես եկան ՀՀ ԱԳ նախարարը, Մադագասկարի ԱԳ նախարար Էլոի Մաքսիմ Դովոն և Ֆրանկոֆոնիայի միջազգային կազմակերպության գլխավոր քարտուղար Միկաել Ժանը:

Իր խոսքում Հայաստանի ԱԳ նախարարը ներկայացրեց երևանյան գագաթաժողովի նախապատրաստական աշխատանքները, կազմակերպվելիք հարակից միջոցառումները՝ վերահաստատելով այս կարևոր միջոցառումը բարձր մակարդակով անցկացնելու Հայաստանի իշխանությունների հանձնառությունը:

«Նախ և առաջ կցանկանայի վերահաստատել, որ Հայաստանի համար մեծ պատիվ է արժանանալ ֆրանկոֆոն պետությունների և կառավարությունների  ղեկավարների վստահությանը՝ Ֆրանկոֆոնիայի XVII գագաթաժողովը կազմակերպելու հարցում ։

Մեծ հպարտություն եմ զգում մեր երկրի համար, որն աշխահում իր «թավշյա հեղափոխության» ժամանակ հռչակ ձեռք բերելով՝ նոր լույսի տակ հանդես կգա հյուրընկալելով այս կարևոր միջազգային հանդիպումը՝ Ֆրանկոֆոնիայի անդամ երկրների և կառավարությունների ղեկավարների համաժողովը։

Հայաստանում տեղի ունեցած վերջին իրադարձությունները, քաղաքացիական շարժման ուժը, վերջինիս ժողովրդական ու ժողովրդավարական բնույթը, հայ երիտասարդների ու կանանց զանգվածային մասնակցությունն այս շարժմանն  ի ցույց դրեցին քաղաքացիական հասարակության ողջ կարևորությունը և բացահայտ կերպով ցուցադրեցին, որ հանդուրժողականության, ժողովրդավարության և խաղաղության արժեքները խարիսխ են գցել մեր երկրում։ Դրանք արժեքներ են, որոնք մենք կիսում ենք ֆրանկոֆոն մեծ ընտանիքի մյուս անդամների հետ։

Այս գագաթաժողովի հաջողությունը երաշխավորելու համար, Հայաստանը, հայ հասարակությունը, ամբողջ երկիրը գործի են դրել իրենց ուժն ու եռանդը։

Արդեն տևական ժամանակ է, ինչ ձևավորվել է Վարչապետի նախագահությամբ գործող և Ֆրանկոֆոնիայի գագաթաժողովի նախապատրաստական աշխատանքների համար պատասխանատու միջկառավարական հանձնաժողովը։ Կամակերպչական հարցերով զբաղվող հատուկ կոմիտե է ստեղծվել նաև ՀՀ արտաքին գործերի գերատեսչությունում, որը սերտորեն համագործակցում է ՖՄԿ համակարգող կոմիտեի հետ։  

Մենք լիահույս ենք, որ գագաթաժողովի արդյունքները կարդարացնեն գագաթաժողովի հիմնական՝  «Ապրել միասին» թեման։ Մենք համոզմունք ունենք, որ մեզ բոլորիս բնորոշ մարդասիրական արժեքներով «Միասին ապրելը» կարող է նպաստել մեր հասարակությունների միասնականության ամրապնդմանն ու ֆրանկոֆոն տարածությանը բերել խաղաղություն և բարգավաճում: «Միասին ապրել» գաղափարի իրագործումը Ֆրանկոֆոնիայում նշանակում է նաև ֆրանսերեն լեզվի և բազմազանության նկատմամբ հարգանքի խթանում։

Մենք նաև  շարունակում ենք սերտորեն աշխատել ՖՄԿ քարտուղարության և Ֆրանկոֆոնիայի անդամ երկրների հետ ֆրանկոֆոնիայի հիմնարար՝ «Միասին ապրելու ֆրանկոֆոն կոչ» անունը կրող փաստաթուղթի մշակման շուրջ, որը հնարավորություն կտա միասին իրագործելու այն սկզբունքներն ու արժեքները, որոնք իր մեջ ներառում է «Ապրել միասին» գաղափարը։

Ինչ վերաբերում է Գագաթաժողովի անցկացմանը, մենք նաև ակնկալում ենք  քաջալերել անմիջական շփումները և փոխանակումները պետությունների ու կառավարությունների ղեկավարների միջև, հատկապես դռնփակ նսիտերի և երկկողմ հանդիպումների ժամանակ, որոնք կազմակերպվելու են Գագաթաժողովի շրջանակներում։

Մենք նաև ցանկանում ենք, որ այս հանդիպումը դառնա համակեցության և համախմբման մի մեծ պահ, որն իր արտահայտումը կգտնի ժողովրդական միջոցառումների տեսքով։ Դրանցից ամենանշանավորը համաշխարհային ճանաչում ունեցող ֆրանկոֆոն արտիստների մասնակցությամբ գալա համերգն է, որը տեղի կունենա  հոկտեմբերի 11-ին, Գագաթաժողովի առաջին օրվա ավարտին և կնախորդի պետական ընթրիքին։

Գագաթաժողովի շրջանակներում կարևոր միջոցառումներից մեկը «Ֆրանկոֆոնիայի ավանն» է, որտեղ տեղի կունենան Ֆրանկոֆոնիայի բազմազանությունն արժևորող մշակութային միջոցառումներ, իրենց երկրի գրավչությունները ներկայացնելու համար ֆրանկոֆոն ընտանիքի անդամներին տրամադրված տաղավարների միջոցով։

Վերջիվերջո, մենք ցանկանում էինք, որ տնտեսական հարթությունը նույնպես ներկայացված լինի Ֆրանկոֆոնիայի գագաթաժողովի շրջանակներում։ Այս համատեքստում, մենք նախատեսում ենք անցկացնել երկու նպատակ ունեցող ֆորում․ մի կողմից մենք նախատեսում ենք ստեղծել թվային տեխնոլոգիաների հարցերով նախարարների ցանց, մյուս կողմից տնտեսության դերակատարների միջև շփումների խթանմանը միտված թեմատիկ քննարկումներ կազմակերպել, որոնց նպատակն է վերհանել ժամանակակից տնտեսական իրողությունների մարտահրավերների պայմաններում զարգացման հեռանկարներն ու խոչընդոտները։

Կցանկանայի ընդգծել, որ մենք պատրաստվում ենք համագործակցել Ֆրանկոֆոնիայի անդամ բոլոր երկրների հետ Երևանյան գագաթաժողովը աննախադեպ հաջողության, Ֆրանկոֆոնիայի ինստիտուցիոնալ կյանքի և ֆրանկոֆոն համերաշխության  բացառիկ ժամանակաշրջանի վերածելու համար։

Մենք  կանենք նաև ամեն հնարավորը, որպեսզի Երևանի գագաթաժողովը հնարավորություն տա մեր հյուրերին բացահայտելու մեր նոր, բայց նաև մի քանի հազարամյա Հայաստանը, իր 2800-ամյա մայրաքաղաքով և ֆրանկոֆոն տարածության հարուստ մշակութային բազմազանության մեջ իր բացառիկ մշակութային ժառանգությամբ։

Այսպիսով, ձեզ ասում եմ կհանդիպենք Հայաստանում։ Նոր, բայց միևնույն ժամանակ հազարամյա Հայաստանը ձեզ է սպասում»։

Միջոցառման ընթացքում տեղի ունեցավ Հայաստանի ԱԳ նախարար Զոհրաբ Մնացականյանի կարճատև առանձնազրույցները Կանադայի զբոսաշրջության, պաշտոնական լեզուների և Ֆրանկոֆոնիայի նախարար Մելանի Ժոլիի և ՖՄԿ գլխավոր քարտուղար Միկաել Ժանի հետ: