ՀՀ ԱԳՆ գլխավոր քարտուղարի այցը Դոնի Ռոստով
03 նոյեմբերի, 2018Հոկտեմբերի 27-29-ը աշխատանքային այցով Դոնի Ռոստովում էր գտնվում ՀՀ արտաքին գործերի նախարարության գլխավոր քարտուղար Վահագն Մելիքյանը։
Այցի շրջանակներում Վահագն Մելիքյանը և Դոնի Նախիջևանի հայ համայնքի նախագահ Հարություն Սուրմալյանը ստորագրեցին արձանագրություն, որի համաձայն Հարություն Սուրմալյանը Հայաստանի Հանրապետությանը անհատույց նվիրաբերեց այն տարածքը, որտեղ այժմ գործում է ՀՀ գլխավոր հյուպատոսությունը։ Հարություն Սուրմալյանը նաև խոստացավ մի քանի տարվա ընթացքում կառուցել նոր շենք և այն նույնպես անհատույց փոխանցել Հայաստանի Հանրապետությանը։
Վահագն Մելիքյանը ՀՀ արտաքին գործերի նախարարի պաշտոնակատար Զոհրաբ Մնացականյանի հրամանով Հարություն Սուրմալյանին պարգևատրեց ՀՀ ԱԳՆ առաջին կարգի հուշամեդալով:
Արձանագրության ստորագրման արարողությանը ներկա էին ՀՀ ԱԳՆ Պետական արարողակարգի ծառայության պետ Լևոն Մինասյանը, Դոնի Ռոստովում ՀՀ գլխավոր հյուպատոս Վարդան Ասոյանը, Դոնի հայ երիտասարդական միության և Դոնի Նախիջևանի հայ համայնքի ներկայացուցիչները և այլք։
Ստորագրման արարողությունից հետո Վահագն Մելիքյանը հանդիպում ունեցավ Դոնի հայ երիտասարդների հետ, որի ընթացքում պատասխանեց ներկաների հարցերին։ Հանդիպման ընթացքում քննարկվեցին նաև Դոնի Ռոստովի հայրենակիցների համար առաջնային նշանակություն ունեցող բազմաթիվ հարցեր։