Ռումինական բանակի հայազգի գեներալ Հակոբ Զատիկի հիշատակի արարողություն
27 նոյեմբերի, 2018Նոյեմբերի 27-ին Ռումինիայում ՀՀ դեսպան Սերգեյ Մինասյանը Բուխարեստի «Bellu» գերեզմանատանը մասնակցեց ռումինական բանակի հայտնի հայազգի գեներալ Հակոբ Զատիկի (Iacob Zadic) (08.12.1867–08.04.1970) հիշատակի արարողությանը:
Միջոցառման սկզբում Ռումինիայի հայոց թեմի առաջնորդ Տ. Տաթև եպիսկոպոս Հակոբյանը կատարեց հոգեհանգստյան կարգ` ի հիշատակ արժանավոր գեներալի: Հոգեհանգստյան կարգից հետո ելույթներով հանդես եկան Ռումինիայում ՀՀ դեսպան Սերգեյ Մինասյանն ու Ռումինահայոց միության նախագահ, պատգամավոր Վարուժան Ոսկանյանը:
Իր ելույթում դեսպան Մինասյանը խոսեց Առաջին համաշխարհային պատերազմի ժամանակ հայազգի գեներալի ունեցած վաստակի մասին` մասնավորապես նշելով. «Հաշվի առնելով այն հանգամանքը, որ Հայաստանի Առաջին Հանրապետությունը և Ռումինիայի Թագավորությունը Առաջին աշխարհամարտի տարիներին հանդիսանում էին փաստացի դաշնակիցներ, դրանով իսկ և՜ գեներալ Զատիկը, և՜ ռումինական բանակի հարյուրավոր հայազգի զինվորականներ իրենց ավանդն են ունեցել նաև իրենց պատմական հայրենիքի պաշտպանության գործում: Այս տարի, երբ Ռումինիան նշում է իր միավորման, իսկ Հայաստանի Հանրապետությունը` Առաջին Հանրապետության 100-ամյակները, այսօր մեր այստեղ գտնվելն ու հարգանքի տուրք մատուցելն ավելի քան խորհրդանշական է»:
Վարուժան Ոսկանյանն իր ելույթում հատուկ անդրադարձ կատարեց պատմական Բուկովինա շրջանի միավորման գործում գեներալ Զատիկի ավանդին ՝ հիշելով նաև ռումինական բանակի բազմաթիվ այլ հայազգի զինվորների և սպաների:
Հիշատակի արարողությանը ներկա էին Ռումինիայի ազգային պաշտպանության նախարարության պետքարտուղար Նիկոլաե Նաստան (Nicolae Nasta), Ռումինիայի խորհրդարանում ազգային փոքրամասնությունների ներկայացուցիչներ ներկայացնող պատգամավոր Վարուժան Փամբուկչյանը և ռումինահայ համայնքի բազմաթիվ ներկայացուցիչներ: Արարողությունից հետո ռումինական բանակի պատվո պահակախմբի ներկայությամբ տեղի ունեցավ ծաղկեպսակների զետեղման հանդիսավոր արարողություն։
Տեղեկանք․
Ռումինական բանակի 8-րդ հետևակային դիվիզիայի հրամանատար հայազգի գեներալ Հակոբ Զատիկը մեծ դեր է ունեցել 1918թ. Ռումինիայի, մասնավորապես՝ Բուկովինա շրջանի միավորման գործում: Նշանավոր հայազգի զորավարը եղել է Զինված ուժերի բարձրագույն խորհրդի անդամ՝ պարգևատրվելով Ռումինիայի և այլ երկրների շքանշաններով ու մեդալներով: