Միլանում կայացած ԵԱՀԿ նախարարական համաժողովի շրջանակներում ԵԱՀԿ Մինսկի խմբի համանախագահ երկրները (Ռուսաստանի Դաշնություն, Ամերիկայի Միացյալ Նահանգներ, Ֆրանսիա), Ադրբեջանի արտաքին գործերի նախարար Էլմար Մամեդյարովը և Հայաստանի արտաքին գործերի նախարարի պաշտոնակատար Զոհրաբ Մնացականյանը համաձայնեցին շարունակել աշխատանքները Լեռնային Ղարաբաղի հակամարտության արդար և տևական խաղաղ կարգավորման ուղղությամբ:

Համանախագահ երկրները ողջունեցին սեպտեմբերին Դուշանբեում՝ ԱՊՀ երկրների գագաթաժողովի շրջանակներում Հայաստանի և Ադրբեջանի ղեկավարների զրույցին հաջորդած հրադադարի խախտումների և զոհերի զգալի նվազեցումը։ Նրանք կոչ արեցին կողմերին շարունակելու իրականացնել այնտեղ ձեռք բերված պայմանավորվածությունները և հստակ քայլեր ձեռնարկել երկու ժողովուրդներին խաղաղությանը նախապատրաստելու ուղղությամբ։ Համանախագահ երկրները հույս հայտնեցին, որ մոտ ապագայում կարող է վերսկսվել Ադրբեջանի և Հայաստանի ղեկավարների միջև ինտենսիվ նպատակաուղղված բարձր մակարդակի երկխոսությունը, որը կնպաստի հակամարտության արդար և տևական հանգուցալուծմանը։

Ադրբեջանի ԱԳ նախարարը և Հայաստանի ԱԳ նախարարի պաշտոնակատարը վերահաստատեցին իրենց հանձնառությունը՝ ինտենսիվորեն աշխատելու հակամարտության խաղաղ կարգավորումը խթանելու և հետագա լարվածությունը նվազեցնելու ուղղությամբ: Այս նպատակով նրանք համաձայնեցին կրկին հանդիպել 2019թ. սկզբին ԵԱՀԿ Մինսկի խմբի համանախագահների հովանու ներքո` դյուրացնելու բարձրաստիճան երկխոսությունը: Նրանք ընդգծեցին համանախագահ երկրների կողմից ցուցաբերվող ամուր ներգրավվածությունը և բարեխիղճ միջնորդության ջանքերի դրսևորումը, ինչպես նաև ԵԱՀԿ գործող նախագահի անձնական ներկայացուցչի գործունեությունը: