Ղազախստանում ՀՀ դեսպան Գագիկ Ղալաչյանի հանդիպումը ՂՀ Սահմանադրական խորհրդի նախագահի հետ
27 դեկտեմբերի, 2018Դեկտեմբերի 27-ին Ղազախստանում ՀՀ դեսպան Գագիկ Ղալաչյանը հանդիպում ունեցավ ՂՀ Սահմանադրական խորհրդի նախագահ Կայրաթ Մամիի (Кайрат Абдразакович Мами) հետ:
Ողջունելով հյուրին և շնորհավորելով նշանակման առթիվ` Կայրաթ Մամին գոհունակությամբ արձանագրեց, որ 2019 թվականին լրանում է Ղազախստանի սերտ գործընկերներից մեկի` Հայաստանի հետ կնքված Բարեկամության և համագործակցության մասին համաձայնագրի 20 տարին և հույս հայտնեց, որ երկկողմ հարաբերությունները ևս կշարունակեն զարգանալ ջերմ և արդյունավետ համագործակցության ոգով:
Կայրաթ Մամին կարևորեց Հայաստանի նախաձեռնած «Նոր ժողովրդավարության երկրների սահմանադրական վերահսկողության մարմինների խորհրդաժողով» կազմակերպությունում Ղազախստանի կողմից ստանձնած նախագահությունը:
ՀՀ դեսպանը վստահեցրեց զրուցակցին, որ բոլոր ջանքերը կներդնի, որպեսզի Ղազախստանի հետ երկկողմ սերտ համագործակցությունը շարունակի վերընթաց զարգացում ապրել փոխադարձ հետաքրքրություն ներկայացնող ոլորտներում: