Դեսպան Մկրտչյանի աշխատանքային հանդիպումները Լատվիայի օրենսդիր և գործադիր իշխանության մարմիններում
24 հունվարի, 2019Հունվարի 24-ին Ռիգա կատարած աշխատանքային այցի շրջանակներում Լատվիայում ՀՀ դեսպան Տիգրան Մկրտչյանը (նստավայրը՝ Վիլնյուս) հանդիպումներ ունեցավ Լատվիայի օրենսդիր և գործադիր իշխանության մարմիններում։
Լատվիայի Սաեյմայում (խորհրդարան) դեսպան Մկրտչյանն առանձին հանդիպումներ ունեցավ խորհրդարանի արտաքին հարաբերությունների մշտական հանձնաժողովի նախագահ Ռիհարդս Կոլսի (Rihards Kols) («Ազգային միություն» կուսակցություն), եվրոպական հարցերով մշտական հանձնաժողովի նախագահ Վիտա Անդա Տերաուդայի (Vita Anda Tērauda) («Զարգացմանը՝ Այո» խմբակցություն) և պատգամավոր Իվանս Կլեմենտևսի (Ivans Klementjevs) հետ (Պաշտպանության, ներքին գործերի ու կոռուպցիայի կանխարգելման մշտական հանձնաժողովի անդամ, «Համաձայնություն կուսակցություն»):
Հանդիպումների ընթացքում քննարկվեցին երկու երկրներում տեղի ունեցած խորհրդարանական ընտրություններից հետո Հայաստանի և Լատվիայի օրենսդիր իշխանության մարմինների միջև փոխգործակցության առավել խորացմանն ուղղված քայլեր։
Կողմերը համակարծիք էին, որ ավանդաբար երկու երկրների խորհրդարանների միջև ձևավորված սերտ փոխգործակցությունն ամուր հիմք է հանդիսանում համագործակցությանը նոր լիցք հաղորդելու և նոր գաղափարներ կյանքի կոչելու համար։ Այդ համատեքստում դեսպան Մկրտչյանը կարևորեց խորհրդարանական բարեկամության խմբերի ձևավորման անհրաժեշտությունը, պատգամավորների միջև մշտական կապի առկայությունը։
Առանձնազրույցների ընթացքում ընդգծվեց հայ-լատվիական միջկառավարական հանձնաժողովի հերթական նիստն առաջիկայում անցկացնելու անհրաժեշտությունը, անդրադարձ կատարվեց նաև երկկողմ այցերի կազմակերպմանը: Լատվիացի օրենսդիրներն իրենց պատրաստակամությունը հայտնեցին խորհրդարանական մակարդակով աջակցելու Հայաստանում ընթացող բարեփոխումներին և ժողովրդավարական գործընթացներին։
Նույն օրը Լատվիայի արտաքին գործերի նախարարությունում տեղի ունեցավ ոչ ռեզիդենտ դեսպանների համար նախատեսված տարեկան ընդունելությունը, որի ընթացքում դեսպան Մկրտչյանը Լատվիայի արտաքին գործերի նախարար Էդգարս Ռինկևիչսին (Edgars Rinkēvičs) փոխանցեց ՀՀ արտգործնախարար Զոհրաբ Մնացականյանի շնորհավորական նամակը ԱԳ նախարար նշանակվելու կապակցությամբ, և իր շնորհակալությունը հայտնեց ավելի վաղ Լատվիայի արտաքին քաղաքական տարեկան զեկույցը ներկայացնելիս Հայաստանի հասցեին հնչեցրած բարձր գնահատականի համար, որտեղ Էդգարս Ռինկևիչսը Հայաստանում անցկացված խորհրդարանական ընտրություններն անվանել էր «իրապես ազատ և ժողովրդավար», հավելելով, որ «բարեփոխումներ իրականացնելու Հայաստանի քաջության և վճռականության համար Լատվիան շարունակելու է բոլոր հնարավոր միջոցներով աջակցություն ցուցաբերել»: