Մարտի 17-18-ը ՄԱԿ-ում ՀՀ մշտական ներկայացուցչությունը մասնակցեց ՄԱԿ-ի կայուն զարգացման օրակարգի ֆինանսավորման հարցերով Մեքսիկայում կազմակերպված արտագնա նիստին:

Մեքսիկայի արտաքին գործերի նախարարության կողմից հյուրընկալվող այս միջոցառումն անցկացվում է 2016թ-ից և միտված է ՄԱԿ-ի Տնտեսական և սոցիալական հարցերով խորհրդի միջկառավարական հիմնական գործընթացներին ընդառաջ ՄԱԿ-ի կայուն զարգացման օրակարգի ֆինանսավորման հարցերով բովանդակային երկխոսության խթանմանը` միջազգային փորձագետների, ՄԱԿ-ի քարտուղարության պաշտոնյաների և ՄԱԿ-ում մի շարք մշտական ներկայացուցիչների և կայուն զարգացման հարցերով պատասխանատու դիվանագետների մասնակցությամբ: Գերմանիայի և Շվեյցարիայի կառավարությունների աջակցությամբ Մեքսիկայում անցկացվող այս միջոցառման համակազմակերպիչներն են Բանգլադեշը, Կաբո Վերդեն, Չիլին, Չեխիան, Եթովպիան, Ինդոնեզիան և այս տարի առաջին անգամ` նաև Հայաստանը:

Միջոցառման շրջանակներում մարտի 18-ին տեղի ունեցած միջազգային տնտեսական կայունության վրա ազդող գործոնների և ֆինանսական և տեխնոլոգիական նորարարություններով պայմանավորված արդիական ռիսկերի վերաբերյալ թեմատիկ նիստը նախագահեց և համակարգեց ՄԱԿ-ում ՀՀ մշտական ներկայացուցչի տեղակալ Սոֆյա Սիմոնյանը: