Վիետնամում ՀՀ դեսպան Ռաիսա Վարդանյանը հրաժեշտի հանդիպում ունեցավ ՎՍՀ փոխնախագահ ՆԳ Դանգ Թի Նոք Թինի (Dang Thi Ngoc Thinh) հետ։

Դեսպան Վարդանյանը շնորհակալություն հայտնեց ՎՍՀ նախագահին, փոխնախագահին, կառավարությանը և վիետնամական բոլոր պետական և ոչ պետական կազմակերպություններին ՀՀ դեսպանությանն անվերապահ աջակցելու և արդյունավետ համագործակցելու համար։

ՎՍՀ փոխնախագահը բարձր գնահատեց ՀՀ դեսպան Ռաիսա Վարդանյանի ավանդը հայ-վիետնամական հարաբերությունների զարգացման գործում և հաջողություններ մաղթեց դեսպանի հետագա գործունեությանը։

Դեսպան Վարդանյանն անդրադարձավ հայ-վիետնամական փոխադարձ ներդրումներին, առողջապահության, կրթության և գիտության, զբոսաշրջության, գյուղատնտեսության, տեղեկատվական տեխնոլոգիաների ոլորտներում հայ-վիետնամական համագործակցության հեռանկարներին։

ՎՍՀ փոխնախագահ Դանգ Թի Նոք Թինը կարևորեց հայ-վիետնամական հարաբերությունների հետագա խորացումը և նշեց, որ անհրաժեշտ է պահպանել երկու երկրների միջև բարձրաստիճան պատվիրակությունների փոխանակման ակտիվությունը։ Փոխնախագահը նույնպես անդրադարձավ երկու երկրների միջազգային կառույցներում համագործակցության և փոխադարձ աջակցության բարձր մակարդակին նշելով, որ Հայաստանը և Վիետնամը մշտապես միմյանց աջակցել են փոխադարձ կարևորություն ներկայացնող հարցերում։

Կողմերը քննարկեցին նաև հայ-վիետնամական օրակարգի այլ հարցեր։