ՀՀ ԱԳՆ կենտրոնական ապարատի և օտարերկրյա պետություններում ՀՀ դիվանագիտական ծառայության մարմինների ղեկավարների ամենամյա համաժողովի մասնակիցների հանդիպումն Ազգային Ժողովում
29 օգոստոսի, 2019
Օգոսոտոսի 29-ին ՀՀ Ազգային Ժողովում տեղի ունեցավ ԱԳՆ կենտրոնական ապարատի և օտարերկրյա պետություններում ՀՀ դիվանագիտական ծառայության մարմինների ղեկավարների ամենամյա համաժողովի մասնակիցների հանդիպումը Աժ խորհրդի անդամների, խորհրդարանական պատվիրակությունների և բարեկամության խմբերի ղեկավարների հետ:
Բացման խոսքով հանդիպման մասնակիցներին ողջունեց ԱԺ նախագահ Արարատ Միրզոյանը:
Ելույթով հանդես եկավ նաև ԱԺ Արտաքին հարաբերությունների մշտական հանձնաժողովի նախագահ Ռուբեն Ռուբինյանը:
Շնորհակալություն հայտնելով նման ձևաչափով հանդիպման կազմակերպումն ապահովելու համար՝ նախարար Մնացականյանն իր խոսքում նշեց.
«Մեզ համար սա կարևոր միջոցառում է՝ առավել ամրապնդելու համակարգումը Հայաստանի կառավարման տարբեր մարմինների և գերատեսչությունների միջև՝ երկրի առջև ծառացած հարցերը հասցեագրելու նպատակով:
Միևնույն ժամանակ մեզ համար առավել քան կարևոր է այս միջոցառման շրջանակներում Հայաստանի ժողովրդի ընտրյալ ներկայացուցիչների՝ Ազգային ժողովի պատգամավորների հետ բաց և անկաշկանդ քննարկումը մեզ բոլորիս հուզող հարցերի շուրջ»:
Հանդիպման ընթացքում տեղի ունեցավ մտքերի հանգամանալից փոխանակում խորհրդարանական տարբեր ձևաչափերում համագործակցության ամրապնդման և ընդլայնման, խորհրդարանական դիվանագիտության ներուժի լիարժեք կիրառման, Հայաստանի արտաքին քաղաքականության առաջնահերթությունների և դրանց հասցեագրման ուղղությամբ ձեռնարկվելիք միասնական քայլերի շուրջ: