Վիեննայում ԵԱՀԿ Մշտական խորհրդի առցանց նիստին Հայաստանի Հանրապետության, Բելառուսի Հանրապետության, Ղազախստանի Հանրապետության, Ղրղզստանի Հանրապետության, Մոլդովայի Հանրապետության, Ռուսաստանի Դաշնության, Սերբիայի հանրապետության, Տաջիկստանի Հանրապետության, Թուրքմենստանի և Ուզբեկստանի Հանրապետության մշտական ներկայացուցիչները հանդես են եկել Երկրորդ համաշխարհային պատերազմում տարած հաղթանակի 75-ամյակին նվիրված համատեղ հայտարարությամբ.

«Այս տարի մենք տոնում ենք մի նշանակալի հոբելյան` Երկրոդ համաշխարհային պատերազմում տարած հաղթանակի 75-ամյակը: ԵԱՀԿ օրակարգում այս թեմայի արդիականության մասին է վկայում 2019թ. դեկտեմբերի 6-ին Բրատիսլավայոaւմ կայացած ԱԳ նախարարների խորհրդի ընթացքում Հայաստանի, Ադրբեջանի, Բելառուսի, Ղազախստանի, Մոլդովայի, Ռուսաստանի, Սերբիայի, Տաջիկստանի, Թուրքմենտանի, Ուզբեկստանի արտաքին գործերի նախարարությունների կողմից ընդունված համատեղ հայտարարությունը»: 

Երկրորդ համաշխարհային պատերազմն աշխարհով մեկ միլիոնավոր կյանքեր խլած սարսափելի ողբերգություն էր, որը վերածվեց մարդկության պատմության մեծագույն հումանիտար աղետի:

Մենք հարգանքի տուրք ենք մատուցում բոլոր նրանց հիշատակին, ովքեր ընկան գերմանական նացիզմի, իր դաշնակիցների և հանցակիցների, ծանրագույն հանցագործություններ իրականացնողների դեմ պայքարում՝ հակահիտլերյան կոալիցիայի անդամ պետությունների մասնակիցներին, պարտիզաններին և դիմադրության խմբերի անդամներին, Հոլոքոստի, Արևելյան Եվրոպայի և ԽՍՀՄ-ի բնակչության ոչնչացմանն ուղղված նացիստական «Օստ» ծրագրի զոհերին:

Նացիզմի դեմ հաղթանակը մեր ազգերի` ազատության և անկախության պաշտպանության համար դրսևորվող ինքնազոհության և հերոսության, արդարության, մարդասիրության և բարու հաղթանակի խորհրադնիշն է։ Պատերազմից հաջորդող տարիներին զուգահեռ առավել ակնհայտ է դառնում Մեծ Հաղթանակի նշանակությունը միջազգային իրավունքի սկզբունքների ձևավորման, անվտանգության լուրջ մարտահրավերների ու սպառնալիքների, նացիստական գաղափարախոսության, ծայրահեղականության և այլատյացության դրսևորումների չթույլատրման հարցում:

Առանձնակի կարևոր ենք համարում Երկրորդ աշխարհամարտի վերաբերյալ պատմական ճշմարտության պահպանումը և դրա իրավական արդյունքների վերանայման անթույլատրելիությունը՝ այդ թվում հաշվի առնելով ՄԱԿ կանոնադրությունը և Նյուրնբերգի Միջազգային ռազմական դատարանի որոշումները։ Մենք արժևորում ենք 1948թ. «Ցեղասպանության հանցագործությունը կանխելու և դրա համար պատժի մասին» ՄԱԿ կոնվենցիան՝ որպես միջազգային կարևոր գործիք։

Միևնույն ժամանակ վերոնշյալ ճշմարտությունն աստիճանաբար մոռացվում է և հաճախ աղավաղվում՝ հարմարեցվելով քաղաքական իրավիճակին։ Ոչնչացվում են ազատամարտիկների հուշարձաններ, սերմանվում են նեոնացիստական և ծայրահեղական աջակենտրոն հայացքներ։ 

Հիշեցնենք, որ ռազմադաշտում և աշխատանքային ճակատում Հաղթանակ կերտած հերոսների հիշատակին հարգանքի տուրք մատուցելը ընդհանուր ներդրումն է մեր ժողովուրդների հերոսության և խաղաղության ու առաջընթացի համար վճարած գնի մասին պատմական հիշողության պահպանման գործում։ 

Կոչ ենք անում համաշխարհային հանրությանը վճռականորեն ընդդիմանալ նացիզմի գաղափարախոսության վերականգնմանը, ռասիզմի, ծայրահեղականության, էթնիկական, ռասայական և կրոնական հողի վրա ատելության, այլատյացության և անհանդուրժողականության ցանկացած դրսևորման քարոզին:

Այդ սարսափելի պատերազմի դասերը պետք է մնան որպես բարոյական ուղեցույց և շարժիչ ուժ ամբողջ առաջադեմ մարդկության համար: Դա նաև նախազգուշացում է նոր համաշխարհային պատերազմի անթույլատրելիության մասին, որը կարող է մարդկության համար վերջինը դառնալ:

Ընդգծում ենք այս թեմայի միավորող ներուժը և ԵԱՀԿ օրակարգում դրա հետագա ամրապնդման անհրաժեշտությունը: Հանդես ենք գալիս միջազգային լայն երկխոսության օգտին` հիմնված իրավահավասարության և փոխադարձ հարգանքի վրա` հանուն միջազգային անվտանգության և վստահության համակարգի ամրապնդման: