Դեկտեմբերի 14-ին ՀՀ ԱԳ նախարարի տեղակալ Պարույր Հովհաննիսյանը հանդիպում է ունեցել Պարագվայի Հանրապետության արտաքին հարաբերությունների նախարարի տեղակալ Վիլմա Պատրիսիա Ֆրուտոս Ռուիսի հետ, ով Երևանում է գտնվում  Դեպի ծով ելք չունեցող զարգացող երկրների նախարարական հանդիպմանը մասնակցելու նպատակով:

Հանդիպման ընթացքում ընդգծվել է հայկական կողմի շահագրգռվածությունը Պարագվայի հետ բազմաբնույթ հարաբերությունները զարգացնելու ուղղությամբ: Այդ համատեքստում Պարույր Հովհաննիսյանը նշել է, որ առաջիկայում նախատեսվում է Մոնտեվիդեյում Հայաստանի դեսպանության համատեղության կարգով հավատարմագրումը նաև Պարագվայում, ինչը հաստատապես իր նպաստը կբերի երկկողմ առարկայական օրակարգի ձևավորմանը:

Պարագվայի ԱԳ նախարարի տեղակալը, շնորհակալություն հայտնելով հայկական կողմի հյուրընկալության համար, վերահաստատել է Պարագվայի շահագրգռվածությունը՝ զարգացնելու Հայաստանի հետ հարաբերությունները:

Հանդիպման ընթացքում զրուցակիցները քննարկել են հայ-պարագվայական օրակարգի զարգացման հնարավորությունները ինչպես երկկողմ, այնպես էլ բազմակողմ հարթակներում:

Նախարարի տեղակալը ներկայացրել է Հայաստանի շուրջ ստեղծված անվտանգային իրավիճակը, ինչպես նաև Հայաստանի և Ադրբեջանի միջև հարաբերությունների կարգավորման ուղղությամբ քայլերը։ Անդրադարձ է կատարվել Ադրբեջանի կողմից էթնիկ զտման հետևանքով Լեռնային Ղարաբաղից բռնի տեղահանված հայերի կարիքների և իրավունքների հասցեագրման ուղղությամբ իրականցվող ՀՀ կառավարության ջանքերին:

Մտքեր են փոխանակվել նաև Լատինական Ամերիկայում և Հարավային Կովկասում զարգացումների, միջազգային մի շարք այլ հրատապ հարցերի վերաբերյալ: