ՀՀ ԱԺ-ում կառավարության հետ հարցուպատասխանի ժամանակ ՀՀ ԱԳ նախարար Արարատ Միրզոյանը պատասխանել է պատգամավորների հարցերին:

Հարց (Սոնա Ղազարյան). «Մեծարգո՛ պարոն վարչապետ, հարգելի՛ կառավարություն, հարցս ուղղում եմ ՀՀ ԱԳ նախարար Արարատ Միրզոյանին: Պարո՛ն Միրզոյան, նախ կարճ հարց, որն առաջացավ տելագրամյան մի գրառումից, որը հավանաբար ֆինանսավորվում է Կրեմլի կողմից դա մեծ լսարան ունեցող էջ է, որը կա՛մ սխալ թարգմանության, կա՛մ միտումնաբար հայտարարում է, թե Հայաստանի Հանրապետությունը որոշում է կայացրել ՀԱՊԿ-ից դուրս գալ: Հավանաբար այս նիստի խոսակցությունը սխալ թարգմանությամբ է տեղ հասել, խնդրում եմ սա հաստատել:

Իսկ բուն հարցս վերաբերում է հունիսի 11-ին Հայաստանի Հանրապետություն ժամանած Եվրոպայի և Եվրասիայի հարցերով ԱՄՆ փոխպետքարտուղար Ջեյմս Օ՚Բրայնի այցին, մենք գիտենք, որ ամփոփիչ հանդիպման ընթացքում հայտարարվել է, որ գալիք տարվա ընթացքում կձևակերպվի փոխըմբռնման հուշագիր երկկողմ երկխոսության կարգավիճակը փոխարինելով ռազմավարական երկխոսության կարգավիճակի: Երեկվա հանդիպումները, ըստ իս, բավական չեն լուսաբանվել հաշվի առնելով մեդիայի մեծ մասի այլ աշխարհաքաղաքական ճաշակը: Ես կխնդրեի այս հարթակից բացեիք փակագծերը համագործակցության նոր ֆորմատի մասին:»

Պատասխան (Արարատ Միրզոյան). «Հարգելի՛ տիկին Ղազարյան, բարեբախտաբար նիստը տեսագրվում է և ցանկացած մարդ ցանկացած պահի կարող է այդ ձայնագրությունը նայել և ստուգել՝ ով ինչ է ասել: Այն ձևակերպումը, որը Դուք մեջբերեցիք առնվազն չի համապատասխանում իրականությանը: Հայաստանի Հանրապետության վարչապետը չի ասել՝ մենք ՀԱՊԿ-ից դուրս ենք գալիս, Հայաստանի Հանրապետության վարչեպետն ասել է՝ մենք կորոշենք՝ երբ դուրս գանք, բայց հետ չենք գնա: Սա է ասել, ոչ պակաս, բայց ոչ էլ ավել: Եթե որևէ մեկը պնդում է, որ Հայաստանի Հանրապետության վարչապետն ասել է, որ Հայաստանը դուրս է գալիս ՀԱՊԿ-ից, սխալվում է, և սա շատ հեշտ ապացուցելի է: Կրկնում եմ նորից. վարչապետն ասել է՝ մենք կորոշենք, երբ դուրս գանք, բայց հետ չենք գնալու:

Ինչ վերաբերում է Հայաստան-ԱՄՆ երկխոսությանը, սա հերթական՝ 2-րդ, ամփոփիչ նիստն էր: Որպեսզի տեխնիկապես պատկերացնեք նիստի գործընթացը, տարվա մեջ լինում են տարբեր աշխատանքային հանդիպումներ, ոլորտային նիստեր և վերջում՝ ինչ-որ մի փուլի, ամփոփվում են այս աշխատանքները: Եվ եթե Դուք համեմատեք նախորդ նիստի արդյունքներն այս տարվա նիստի արդյունքներով հրապարակված համատեղ հայտարարության հետ, կտեսնեք, որ զգալիորեն ընդլայնվել են և՛ ոլորտները, և՛ կոնկրետ քայլերը, և՛ ձեռքբերումները, որոնք իսկապես շոշափելի են: Ես ուզում եմ մի բան էլ հավելել, որ բացի նրանից, որ համատեղ աշխատանքի մեջ՝ ռազմավարական երկխոսության տիրույթում են այնպիսի ոլորտներ, ինչպիսիք են էներգետիկ համագործակցությունը, տնտեսական համագործակցությունը, ժողովրդավարության աջակցությունը, իրավական բարեփոխումները, նաև պաշտպանության և այլ ոլորտներ, ձեռք բերվեց նաև համաձայնություն բարձրացնել այս համագործակցությունը մեկ աստիճան և գնալ դեպի ռազմավարական գործընկերություն, որն իր հետ կբերի նոր ոլորտներ, նոր գործիքակազմ, նոր մեխանիզմներ:»

Արձագանք. «Շնորհակալություն, պարո՛ն Միրզոյան, ինձ համար հատկանշական են երկու արձանագրումներ. իհարկե, դա Ալմա-Աթայի հռչակագրին համապատասխան Հայաստանի Հանրապետության տարածքային ամբողջականության պաշտպանության ԱՄՆ պատրաստակամությունն է, բայց ինձ համար ևս մեկ կարևոր դրույթ կար. դա վերաբերում է «Խաղաղության խաչմերուկի» տեսլականի հիմքում ԱՄՆ աջակցությանը՝ մշակելու տրանսպորտային ռազմավարություններ: Եթե նպատակահարմար կգտնեք, նաև այս մասին խոսեք, որովհետև տարածաշրջանում հարատև խաղաղություն ունենալու համար, փաստորեն, ԱՄՆ-ը կիսում է մեր այս մոտեցումը, և ի՞նչ աջակցության մասին է խոսքը և ի՞նչ ծավալի: Քանի որ մի փոքր ժամանակ ունեմ, նաև էներգետիկ անվտանգության կոնտեքստն է ինձ հետաքրքրում, քանի որ ակնհայտ է անվտանգային միջավայր ապահովելու համար մեզ հարկավոր է դիվերսիֆիկացնել ոչ միայն անվտանգությունը և տնտեսությունը, այլև էներգետիկ անվտանգությունը: Եթե չեմ սխալվում, այս մասին խոսվել է ապրիլի 5-ին և նաև հիմա, խնդրում եմ բացեք փակագծերը՝ ի՞նչ նկատի ունեք համագործակցության այս կոնտեքստում:»

Պատասխան. «Տիկի՛ն Ղազարյան, անկեղծ ասած, ինքներդ շատ բան ասեցիք, ես թերևս հավելեմ միայն, որ ոչ միայն Միացյալ նահանգները. «Խաղաղության խաչմերուկը»՝ այս նախաձեռնությունը, որով հանդես է եկել կառավարությունը, ողջունում են մի շարք երկրներ, մի շարք երկրների միավորումներ, և ինչի՞ մասին է սա, նորից եթե կարիք կա կմանրամասնենք: Սա մեր տարածաշրջանում տրանսպորտային, տնտեսական ուղղիների, կապերի ապաշրջափակումն է, վերականգնումը, վերակառուցումը, նորերի կառուցումը, եթե անհրաժեշտություն կա՝ համաձայն մի շարք սկզբունքների և պատկերացումների, այն է՝ բոլոր ենթակառուցվածքները պետք է մնան այն երկրների սուվերենության ներքո, որոնց տարածքով անցնում են, պետք է գործեն այն երկրների իրավազորության ներքո որոնց տարածքներով անցնում են և պետք է ամեն ինչ արվի փոխադարձության և հավասարության սկզբունքներին համապատասխան: «Խաղաղության խաչմերուկը» մեծ հաշվով և առաջին հերթին այսքանի մասին է: Եվ հետևաբար թույլ կտամ ինձ եզրակացնել, որովհետև այս ամեն ինչը գրված է նաև և հրապարակված է, այն երկրները և այն մարդիկ, պաշտոնյաները, երբ ասում են, որ աջակցում են «Խաղաղության խաչմերուկին», աջակցում են այս պատկերացումներին, այս սկզբունքներին: Սրա մասին է այս փուլում խոսքը: Իհարկե, առարկայական, իրականացման փուլի համար այլ քայլեր են նախատեսվում և, իհարկե, անշուշտ հարևանների համաձայնությունը: Սա մի առաջարկ է, որ մենք արել ենք մեր հարևաններին և առաջին հերթին Ադրբեջանին, ում հետ շրջափակված են և չեն գործում այդ կապուղիները:»

Հարց (Ռուստամ Բաքոյան). «Իհարկե, գայթակղությունը մեծ է ընդդիմության ստեղծած օրակարգի մասով հարց չտալը, բայց չեմ շեղվի աշխատանքային օրակարգից և կառավարության մեր գործընկերներին ուզում եմ հարցնել. Եվրոպայի խորհուրդն ընդունել է արհեստական բանականության մասին շրջանակային կոնվենցիա, որն ուղղված է արհեստական բանականության համակարգերի օգտագործման մեջ մարդու իրավունքների, իրավունքի գերակայության և ժողովրդավարության ապահովմանը: Նորագույն տեխնոլոգիաների զարգացման ներկայիս տեմպերը թույլ են տալիս ենթադրելու, որ քաղաքականության մշակողներն ավելի շատ պարտավորված են նոր մոտեցումներ ցուցաբերել աշխատանքի իրականացման գործիքակազմի ընտրության մասով: Իհարկե, նաև իմ ուշադրության տիրույթում է օրինաստեղծ աշխատանքի մակարդակում դիտարկել վերոնշյալը, բայց կուզեի հարցնել կառավարության մեր գործընկերներին՝ արդյո՞ք իրենց աշխատանքների մեջ օգտագործում են արհեստական բանականության համակարգեր և այդ ուղղությամբ ի՞նչ աշխատանքներ կան այս պահին:»

Պատասխան (Արարատ Միրզոյան). «Իսկապես, պարոն Բաքոյան, արհեստական բանականությունը սրընթաց, օր օրի, վայրկյան վայրկյանի ավելի է ներխուժում մեր կյանքի բոլոր ոլորտները՝ սկսած կառավարման համակարգերից, վերջացրած բազմաթիվ այլ ոլորտներով: Եվ հիմա երկրները, ինչպես նաև միջազգային կազմակերպությունները, ինչպիսիք են, օրինակ, Եվրոպայի խորհուրդն, ինտենսիվ աշխատում են ներպետական օրենսդրությամբ նաև միջազգային կարգավորումներ մշակելու ուղղությամբ: Կարգավորումներ, որոնք թույլ կտան և մի կողմից չարգելափակել այս ճյուղի կամ այս ոլորտի զարգացումը և մյուս կողմից ապահովել մարդու իրավունքների պատշաճ կերպով պահպանումը և մնացած բոլոր անհրաժեշտ տարրերը: Դուք նշեցիք մեկ կոնվենցիա, ես կարող եմ ևս մեկ-երկուսն ավելացնել: Արտաքին գործերի նախարարության մասով այսքանը թերևս կարող եմ ասել: Ձեզ ուզում եմ վստահեցնել, որ մենք հետևում ենք այս գործընթացին, հետաքրքրված ենք այս գործընթացով և աշխատում ենք կառավարության մյուս վերաբերելի գործընկերների և գերատեսչությունների հետ համատեղ ժամանակի հետ համընթաց գնալու, կոնվենցիաներից, որը որ հարկ կհամարենք վավերացնելու նախաձեռնությամբ հանդես գալու և այլն:»