Միավորված ազգերի կազմակերպության մոդել 2025 համաժողովի եզրափակիչ միջոցառում
11 մարտի, 2025
Մարտի 11-ին ՀՀ ԱԳ նախարարությունում կայացել է ՄԱԿ-ի հայաստանյան գրասենյակի հետ համատեղ կազմակերպված ՄԱԿ-ի մոդել համաժողովի եզրափակիչ նիստը և փակման հանդիսավոր արարողությունը։ Համաժողովը նվիրված էր ՄԱԿ-ին ՀՀ անդամակցության 33-ամյակին և ՀՀ դիվանագետի օրվան։
Միջոցառմանը բացման խոսքով հանդես են եկել ՀՀ ԱԳ նախարարի տեղակալ Վահան Կոստանյանը, ԱԳ նախարարության գլխավոր քարտուղար Դավիթ Կարապետյանը և Հայաստանում ՄԱԿ-ի մշտական համակարգող Ֆրանսուազ Ժակոբը, որին հաջորդել է ՄԱԿ-ի Մարդու իրավունքների խորհրդի նիստի մոդելավորումը՝ ՄԻԽ անդամ և դիտորդ երկրների, ինչպես նաև ՀԿ-ներ ներկայացնող երիտասարդ պատվիրակների մասնակցությամբ։ Համաժողովի արդյունքներով մասնակիցներն ընդունել են Երիտասարդության հռչակագիր։
Գլխավոր քարտուղար Դավիթ Կարապետյանն ողջունել է երիտասարդների ներգրավումը միջազգային հարաբերությունների և դիվանագիտության ոլորտում, բարձր գնահատել երիտասարդների մասնակցությունը միջոցառմանը և շեշտել վերջինիս շարունակական բնույթը։
ՄԱԿ-ի մոդել համաժողովի լավագույն մասնակիցները հնարավորություն կունենան փորձաշրջան անցնելու ՀՀ ԱԳ նախարարությունում և ՄԱԿ-ի հայաստանյան գրասենյակում։